काठमाडौँ — नेपाली राष्ट्रिय फुटबल टोलीका पूर्व फरवार्ड बिमल घर्तीमगरले खेलजीवनबाट सन्न्यासको घोषणा गरेका छन् ।
सामाजिक सञ्जालमा भावुक सन्देश लेख्दै उनले आफ्नो फुटबल यात्रा टुंग्याएको बताएका छन् । आफ्नो यात्रा बुटवलबाट सुरु भई काठमाडौँसम्म पुग्नु लामो र कठिन रहेको बताउँदै उनले देशका लागि मनदेखि खेलेको स्मरण गरेका छन् । फुटबलप्रेमी र शुभचिन्तकले दिएको माया–समर्थनप्रति आभार व्यक्त गर्दै यो निर्णय लिँदा आफू भावुक भएको पनि उनले उल्लेख गरेका छन् ।
नेपाली फुटबलमा ‘गोल्डेन ब्वाई’को उपनामले परिचित बिमलले १४ वर्षकै उमेरमा सन् २०१२ मा राष्ट्रिय टोलीमा स्थान बनाएका थिए । सन् २०१३ मा बंगलादेशविरुद्धको खेलबाट उनले सिनियर राष्ट्रिय टोलीमा डेब्यु गरेका थिए । उमेर समूहका राष्ट्रिय टोलीबाट पनि खेलेका उनले एन्फा एकेडेमीबाट फुटबल सिकेका थिए । सन् २०१४ मा बेल्जियमको एन्डरलेख्ट क्लबको युवा टोलीसँग जोडिने अवसर पाउनु उनको करियरको उल्लेखनीय उपलब्धि थियो ।
उनले भारतको मोहन बगानसहित थ्री स्टार क्लब, मच्छिन्द्र एफसी र नेपाल सुपर लिगको ललितपुर सिटी एफसीबाट व्यावसायिक फुटबल खेले । राष्ट्रिय टोलीबाट ९ गोल गरेका बिमलले सन् २०१९ मा अनुशासनसम्बन्धी घटनापछि निलम्बन भोगेका थिए । केही समयदेखि अस्ट्रेलियामा बस्दै आएका उनले सन्न्याससँगै खेलजीवनको औपचारिक अन्त्य गरेका छन् ।
