लन्डनको सबैभन्दा पुरानो रेस्टुरेन्ट सञ्चालन भइरहेको ऐतिहासिक भवन अब युरोपको ठूलो संरक्षण परोपकारी संस्था नेसनल ट्रस्टको स्वामित्वमा आएको छ। कोभेन्ट गार्डेनको मेडन लेनस्थित ३४–३५ नम्बरको चारतले भवनका मालिक जेपी मेह्यूले करिब एक करोड १० लाख पाउन्ड अर्थात् करिब एक करोड ४० लाख अमेरिकी डलर बराबरको उक्त सम्पत्ति ट्रस्टलाई दान गर्ने निर्णय लिएका हुन्।
‘रूल्स’ नामको यो रेस्टुरेन्ट सन् १७९८ मा थोमस रूलले ओइस्टर बारका रूपमा सुरु गरेका थिए। फ्रान्सेली क्रान्तिपछिको उथलपुथलको समयमा खुलेको यो रेस्टुरेन्टले ब्रिटिस साम्राज्यको उत्कर्षकाल, दोस्रो विश्वयुद्धको बमबारी र सडक विस्तारका नाममा भवन भत्काउने योजनासमेत पार गरेको छ। चार्ल्स डिकेन्स, चार्ली च्याप्लिन, डेभिड बोवी र म्याडोनाजस्ता चर्चित व्यक्तित्वले यहाँ भोजन गरेका छन् भने राजा एडवर्ड सातौँ पनि यहाँ आउने गरेको इतिहास छ।
भवनसँगै आगन्तुक पुस्तिका, पुराना मेनु, कार्टुन, तस्बिर, रङ्गीन सिसा र सङ्केतचिह्न पनि दानमा समावेश छन्। रेस्टुरेन्ट यथावत सञ्चालनमा रहनेछ र व्यवसायबाट आउने वार्षिक भाडा संरक्षण कार्यमा खर्च हुनेछ। सन् १९८९ देखि त्यहाँ कार्यरत सञ्चालक रिकी म्याकमनेमीले यो व्यवस्थाले सुरक्षा र मानसिक शान्ति दुवै दिएको प्रतिक्रिया दिएका छन्।
नेसनल ट्रस्टले रूल्सलाई ऐतिहासिक भवन र त्यसको मौलिक प्रयोग दुवै कायम रहेको ‘जीवित सम्पदा’ को दुर्लभ उदाहरण भनेको छ। ट्रस्टका महानिर्देशक हिलारी म्याकग्राडीका अनुसार यहाँका कुनाकाप्चाले राजा–महाराजाको भोजन, लेखक तथा राजनीतिज्ञका भेटघाट र युद्ध तथा उथलपुथलबीच पनि जोगिएको परम्पराको कथा सुनाउँछन्।
