काठमाडौं । गृहमन्त्री सुधन गुरुङ शनिबार काठमाडौंमा आयोजित एक कार्यक्रमको बिचमै उठेर बाहिरिएका छन्। राष्ट्रिय स्वतन्त्र पार्टीको गोरखा–काठमाडौँ सम्पर्क विभागले नयाँ बजारमा आयोजना गरेको कार्यक्रममा वक्ताको संख्या धेरै भएपछि उनले कार्यव्यस्तता देखाउँदै कार्यक्रम छोडेका हुन्।
कार्यक्रम चलिरहेकै बेला गृहमन्त्री बाहिरिएपछि आयोजकहरू अलमलमा परेका थिए। कार्यक्रमबाट बाहिरिएपछि भने उनले आफ्नो निर्वाचन क्षेत्र गोरखाको विकासका विषयमा प्रतिक्रिया दिए। उनले भौगोलिक विकटता र बाटोको अभावका कारण हिमाली क्षेत्रका नागरिकले भोग्नुपरेका समस्या सरकारले समाधान गर्ने बताए।
गृहमन्त्री गुरुङले आगामी दिनमा सरकारले हिमाली तथा दुर्गम क्षेत्रमा बाटो निर्माण र बजेट व्यवस्थापनमा विशेष ध्यान दिने उल्लेख गरे। देशका सबै स्थानमा नागरिकले भोग्नुपरेका समस्यालाई वर्तमान सरकारले केन्द्रमा राखेको उनको भनाइ थियो।
गृहमन्त्रीको अचानक बाहिरिने कदमले कार्यक्रममा उपस्थित सहभागीहरूबीच केही बेर अन्योल देखिएको थियो। तर कार्यक्रम भने आयोजकहरूले निरन्तरता दिएका थिए।
