वायुयान तथा त्यसका पार्टपुर्जाको आयात–निर्यात प्रक्रिया अब अनलाइन प्रणालीबाटै हुने भएको छ। भन्सार विभाग र नेपाल नागरिक उड्डयन प्राधिकरणबीच बुधबार यससम्बन्धी सम्झौता भएको हो।
नेपाल राष्ट्रिय एकद्वार प्रणालीमार्फत सेवा प्रवाह गर्ने उद्देश्यले दुई निकायबीच सहमति भएको छ। एकद्वार प्रणालीमार्फत सेवा लिँदा सरोकारवालाले एउटै माध्यमबाट आवश्यक प्रक्रिया पूरा गर्न सक्नेछन्, जसले समय र लागत दुवै घटाउने अपेक्षा गरिएको छ।
सम्झौताअनुसार वायुयान तथा पार्टपुर्जा (एचएस कोड ८८०१ र ८८०२) आयात–निर्यात गर्दा चाहिने प्राधिकरणको सिफारिस र अनुमति अब अनलाइन प्रणालीबाटै उपलब्ध हुनेछ।
यस व्यवस्थाले सिफारिसका लागि विभिन्न सरकारी निकायमा भौतिक रूपमा धाउनुपर्ने र कागजी प्रक्रिया पूरा गर्नुपर्ने झन्झट घट्ने अपेक्षा गरिएको छ। वायुयानको मर्मतसम्भार र नियमित सञ्चालनका लागि पार्टपुर्जा समयमै उपलब्ध हुनु अत्यावश्यक हुन्छ, त्यसैले प्रक्रियाको सरलीकरणले उड्डयन क्षेत्रलाई सहजता पुग्ने विश्वास गरिएको छ।
उड्डयन क्षेत्रमा पार्टपुर्जाको आयात–निर्यात नियमित रूपमा हुने भएकाले अनलाइन व्यवस्था लागू भएपछि सरोकारवालाले प्रत्यक्ष लाभ पाउने अपेक्षा गरिएको छ। नयाँ व्यवस्थाले आयात–निर्यात प्रक्रिया छिटो, पारदर्शी र प्रविधिमैत्री बनाउनुका साथै सरकारी निकायबीच डिजिटल समन्वय बढ्ने विश्वास गरिएको छ।
