काठमाडौं — बडादसैँको उल्लास विजयादशमीसँगै सकिएको छैन। टीकाको दोस्रो दिन बिहीबार पनि गाउँ–सहरका घरघरमा नवदुर्गाको प्रसादका रूपमा टीका र जमरा ग्रहण गर्ने क्रम जारी रह्यो। विजयादशमीका दिन आफ्नै परिवारभित्र टीका–जमरा लगाएकाहरू आज टाढा–टाढा रहेका आफन्त तथा मान्यजनकहाँ पुगेर आशीर्वाद थाप्न व्यस्त देखिए।
वर्षमा एकपटक मात्र आउने यो अवसरमा टाढा रहेका मान्यजनकहाँ गई आशीर्वाद लिने चलन धेरैजसो नेपाली घरपरिवारमा कायम छ। कोही आजै आफन्तकहाँ पुगेका छन् भने कोही आगामी दिनमा जाने तयारीमा छन्।
नेपालका कतिपय ठाउँमा विजयादशमीका दिन मात्र टीका लगाउने परम्परा रहे पनि अधिकांश ठाउँमा टीका लगाउने क्रम कोजाग्रत पूर्णिमासम्म नै चल्ने गर्दछ। टीका नवदुर्गा भवानीको प्रसाद भएकाले पूर्णिमासम्म टीका–जमरा लगाएर आशीर्वाद ग्रहण गर्न सकिने नेपाल पञ्चाङ्ग निर्णायक समितिले जनाएको छ।
