जेरुसेलम — इजरायली प्रधानमन्त्री बेन्जामिन नेतान्याहुले वेस्ट बैंकमा दशकौँयताकै सबैभन्दा ठुलो र व्यापक सैन्य कारबाही गर्ने तयारी भएको बताएका छन्। इजरायली सेना त्यसका लागि पूर्ण रूपमा तयार रहेको उनको भनाइ छ।
वेस्ट बैंकको हेब्रोनमा भएको दोहोरो गोलाबारीपछि प्रतिक्रिया दिँदै नेतान्याहुले उक्त क्षेत्रमा ‘पूर्ण लकडाउन’ लागू गर्ने घोषणा गरेका हुन्। उक्त भिडन्तमा इजरायली सेनाको कारबाहीमा दुई प्यालेस्टाइनी मारिए भने इजरायली पक्षका दुई सैनिकको मृत्यु र अन्य तीन जना घाइते भए।
घटनालगत्तै इजरायलले वेस्ट बैंकका विभिन्न सहर र गाउँका प्रवेश नाकामा कडा चेकजाँच तथा अवरोध खडा गर्दै आवतजावतमा पूर्ण रोक लगाएको छ। अलजजिराका अनुसार लकडाउनका कारण रामल्लाहलगायत क्षेत्रमा जनजीवन ठप्प भएको छ र प्यालेस्टाइनी नागरिकहरू आफ्नै सहर र घरभित्र थुनिन बाध्य भएका छन्।
यसैबीच इजरायली सेनाले घटना भएको हेब्रोन क्षेत्र वरपरका प्यालेस्टाइनी संरचना र घरहरू भत्काउन थालिसकेको छ। स्थानीय स्रोतका अनुसार सेनाले बुलडोजर चलाउनुअघि बासिन्दाहरूलाई घर खाली गर्न जम्मा पाँच मिनेट मात्र समय दिएको थियो।
