सिवान। भारतको बिहार राज्यस्थित सिवान जिल्लाको आलमपुर गाउँमा शुक्रबार साँझ पटाका गोदाममा भएको भीषण विस्फोटमा पति–पत्नी र उनीहरूकी छोरीसहित सात जनाको मृत्यु भएको छ।
घरमा पटाका बनाउने काम भइरहेका बेला एक्कासि विस्फोट भएपछि त्यहाँ भण्डार गरिएका अन्य पटाकामा पनि आगो सल्किएको थियो। त्यसपछि करिब दुई घण्टासम्म बीचबीचमा विस्फोटको धमाका सुनिएको स्थानीय बासिन्दाले बताएका छन्। विस्फोटको तीव्रताले घरको ठुलो भाग भत्किएर सडकसम्म खसेको थियो।
स्थानीयका अनुसार यो घर पटाका कारोबारमा संलग्न मोहम्मद अमिरुद्दिन मियाँको हो। भारतीय सञ्चारमाध्यम हिन्दुस्तान टाइम्सका अनुसार विस्फोट भएको घरमा पटाका उत्पादन गर्ने अनुमति प्राप्त कारखाना सञ्चालनमा थियो। दैनिक भास्करले भने भग्नावशेष सडकसम्म पुगेको र घटनास्थलमा शवका टुक्रा छरिएको उल्लेख गरेको छ।
घटनापछि सिवानका जिल्ला अधिकारी विजय प्रकाश मीना र प्रहरी प्रमुख भरत सोनीसहितको टोली घटनास्थल पुगेको थियो। जिल्ला अधिकारी मीनाका अनुसार मृतकका शव क्षतविक्षत अवस्थामा फेला परेकाले पहिचान गर्न कठिनाइ भइरहेको छ। घटनामा मृत्यु हुनेको सङ्ख्या सुरुमा चार बताइए पनि पछिल्लो विवरणअनुसार सात पुगेको समाचारमा उल्लेख छ।
