पोखरा । पोखरा अन्तर्राष्ट्रिय विमानस्थलबाट नियमित अन्तर्राष्ट्रिय उडान सञ्चालन गर्दै आएको फ्लाइ दुबईले शुक्रबार एक महिना पूरा गरेको छ। गत असोज ७ गतेदेखि पोखरा–दुबई रुटमा उडान सुरु गरेको कम्पनीले पहिलो महिनामै ३० वटा उडान सञ्चालन गरेको छ।
पोखरा अन्तर्राष्ट्रिय विमानस्थल नागरिक उड्डयन कार्यालयका महाप्रवन्धक जगन्नाथ निरौलाका अनुसार यस अवधिमा दुबईबाट पोखरा आउने ४ हजार ५२१ र पोखराबाट दुबई जाने १ हजार ८४१ गरी कुल ६ हजार ३६२ यात्रुले सेवा लिएका छन्।
महाप्रवन्धक निरौलाले दसैँ र तिहारका कारण दुबईबाट आउने यात्रुको सङ्ख्या बढेको र पोखराबाट जाने यात्रुको सङ्ख्या पनि क्रमशः बढिरहेको बताए। पहिलो महिनाको उपलब्धिलाई उनले उत्साहजनक भनेका छन्।
पोखरा महानगरपालिकाका प्रमुख धनराज आचार्यले उडानको निरन्तरताका लागि सन् २०२७ को अक्टोबरसम्म टिकट बुकिङ खुला गरिएको जानकारी दिए। उनका अनुसार फ्लाइ दुबई र साझेदार एमिरेट्समार्फत एउटै टिकटमा विश्वका ३०० भन्दा बढी गन्तव्यमा यात्रा गर्न सकिन्छ।
२०७९ पुस १७ मा उद्घाटन भएको पोखरा विमानस्थलबाट लामो समयसम्म नियमित अन्तर्राष्ट्रिय उडान हुन सकेको थिएन। नियमित उडान सुरु भएपछि पर्यटन, व्यापार र क्षेत्रीय आर्थिक विकासमा सकारात्मक योगदान पुग्ने अपेक्षा गरिएको छ।
