काठमाडौँ — सडकमा माटो खसालेर फोहोर गरेको आरोपमा काठमाडौँ महानगरपालिकाले एक व्यक्तिलाई ५० हजार रुपैयाँ जरिवाना तिराएको छ।
महानगरको वडा नम्बर ३ मा रहेको थाई राजदूतावास अगाडिको सडकमा नयाँ घर निर्माण गर्ने क्रममा माटो खसालिएको थियो। निर्माण कार्यका क्रममा सडकमा जथाभाबी माटो फालेर सार्वजनिक स्थान फोहोर गरेको तथा वातावरण प्रदूषण गरेको भन्दै महानगर प्रहरी बलले सम्बन्धित व्यक्ति मनोज उप्रेतीलाई उक्त रकम जरिवाना गरेको हो।
महानगरपालिकाले सडक तथा सार्वजनिक स्थानमा निर्माण सामग्री राखेर फोहोर गर्ने कार्यविरुद्ध पछिल्लो समय कडा कदम चाल्दै आएको छ। सडकमा निर्माण सामग्री थुपार्ने र फोहोर गरी सहरी सौन्दर्यमा असर पुर्याउने कार्य बढ्न थालेपछि महानगरले त्यस्ता कार्यलाई निरुत्साहित गर्दै आएको हो।
सार्वजनिक स्थानमा निर्माण सामग्री राख्नु र जथाभाबी फोहोर गर्नु कानुनविपरीत हुने भएकाले महानगरले यस्ता कार्यमा संलग्नलाई कारबाही गर्ने जनाएको छ। महानगर प्रहरी बलले सडक तथा सार्वजनिक स्थानको सरसफाइ र सहरी सौन्दर्य कायम राख्न अनुगमन गरिरहेको छ।
पछिल्लो समय सडक तथा सार्वजनिक स्थानमा निर्माण सामग्री थुपार्ने र फोहोर गर्ने कार्य बढ्न थालेपछि महानगरले त्यस्ता कार्यलाई निरुत्साहित गर्न कारबाही तीव्र पारेको छ। महानगरले सडक र सार्वजनिक स्थानको सरसफाइ कायम राख्न निर्माण कार्यमा संलग्न सबैलाई सचेत रहन आग्रह गरेको छ।
