बुटवल । नेकपा एमालेका महासचिव शंकर पोखरेलले अहिलेको सरकार बाहिरी शक्तिको इशारामा चलिरहेको जस्तो देखिएको बताएका छन् । रुपन्देहीको बुटवलमा प्रेस चौतारी नेपालले आयोजना गरेको पत्रकार भेटघाटमा बोल्दै उनले सरकारको काम गर्ने तरिकाले देशभित्र मात्र होइन, छिमेकी मुलुकहरूमा समेत यस्तो शंका जन्माएको दाबी गरे ।
भूराजनीतिक तनावका बीच सरकार र त्यसको नेतृत्व जसरी अघि बढिरहेको छ, त्यसले नेपालको संवेदनशील भूराजनीतिक अवस्थालाई नै जोखिममा पारेको उनको भनाइ थियो । उनले पछिल्लो समय मुलुकमा लोकतन्त्रको भविष्यसमेत संकटतर्फ धकेलिँदै गएको आरोप लगाए ।
लोकतन्त्रको मूल आधार भनेको संगठित हुने र आफ्ना विचार स्वतन्त्र रूपमा राख्न पाउने अधिकार भएको उल्लेख गर्दै पोखरेलले विश्वविद्यालय र क्याम्पसहरूमा विद्यार्थी संगठनका गतिविधिमाथि रोक लगाउने प्रयास भइरहेको बताए । त्यस्तै ट्रेड युनियनका गतिविधिलाई समेत नियन्त्रण गर्न खोजिएको उनको आरोप थियो ।
गृह मन्त्रालयको आदेशको नाममा प्रदर्शन र विरोधका कार्यक्रम नगर्न दबाब दिने तथा पत्रकारहरूलाई सञ्चारमाध्यमबाटै पक्राउ गर्ने घटनाले लोकतान्त्रिक अभ्यासमाथि प्रश्न उठाएको उनले बताए । प्रधानमन्त्रीका सल्लाहकारले सामाजिक सञ्जालमा पत्रकारलाई लक्षित गरी टिप्पणी गर्ने गरेको प्रसंग उठाउँदै उनले पत्रकारिता र अभिव्यक्ति स्वतन्त्रतामाथि नियन्त्रणको प्रवृत्ति देखिएको आरोप लगाए ।
राज्यका जिम्मेवार पदमा रहेकाहरूले परिपक्व व्यवहार देखाउनुपर्नेमा सामाजिक सञ्जालका गतिविधिमा अल्झिएको उनको भनाइ थियो । ‘राज्य राज्यजस्तो छैन, सरकार सरकारजस्तो छैन,’ पोखरेलले भने, ‘राज्यका कार्यकारी भूमिकामा रहेका व्यक्तिहरूको व्यवहार बालबालिकाले खेल्ने भाँडाकुटी खेलेजस्तो देखिन थालेको छ ।’ यस्ता गतिविधिले लोकतन्त्र कमजोर हुनुका साथै संविधानको कार्यान्वयन र संस्थागत आधारसमेत खस्किँदै गएको उनको आरोप थियो ।
