काठमाडौँ । बागलुङमा विद्यालय गाभ्ने र शिक्षकको जबर्जस्ती मिलान गर्ने स्थानीय तहको निर्णयविरुद्ध संघीय शिक्षण अनुदानका शिक्षकहरूले आपत्ति जनाएका छन् ।
संघीय शिक्षक सिक्का अनुदान बाग्लुङ जिल्लाका अध्यक्ष नवीन शर्माले यस्तो नीतिले बालबालिकाको पठनपाठनमा र शिक्षकहरूको रोजगारीमा गम्भीर असर पर्ने बताएका छन् । विशेषगरी शैक्षिक सत्रको बीचमा विद्यालय गाभ्दा विद्यार्थीहरूलाई अर्को विद्यालयमा सर्न मानसिक रूपमा कठिनाइ हुने र अध्यापन गराइरहेका शिक्षकहरूको जागिर धरापमा पर्ने उनको भनाइ छ ।
शर्माले भने, ‘स्थानीय तहले गर्ने भनिएको यो प्रक्रिया तत्कालका लागि चालू आर्थिक वर्षसम्म रोक लगाउन सरकारसँग माग गर्छु । स्थानीय तहको अधिकार क्षेत्रभित्र पर्ने भए तापनि केन्द्र सरकारबाट हस्तक्षेप गरी यसलाई हाललाई रोकियोस् भन्ने माग गर्छु ।’
यससम्बन्धी समस्याबारे शिक्षा समन्वय अधिकारी र सम्बन्धित निकायलाई निवेदन दिई ध्यानाकर्षण गराउने पहल भइरहेको उनले जानकारी दिएका छन् ।
यदि मागको सुनुवाइ नभएमा माइतीघरमा एक्लै भए पनि धर्ना तथा विरोधका कार्यक्रमहरू गर्ने योजना रहेको उनले बताएका छन् । यो समस्या बाग्लुङ जिल्लाको मात्र नभई समग्र शिक्षा क्षेत्रको भविष्यसँग जोडिएकोले यसलाई हलुका रूपमा नलिन सरकारलाई आग्रह गरिएको छ ।
