१६ कात्तिक, काठमाडौं । प्रतिपक्षी दलहरूले संसद्को अधिवेशन यथाशीघ्र बोलाउन सरकारसँग आग्रह गरेका छन् । नेपाली कांग्रेसको आह्वानमा सोमबार बसेको प्रतिपक्षी दलहरूको बैठकले अधिवेशन बोलाएर जनताका सवाल, राष्ट्रियता, लोकतन्त्र र संविधानमाथि उठेका प्रश्नमा गम्भीर छलफल गर्नुपर्ने निष्कर्ष निकालेको हो ।
बैठकमा सहभागी नेपाल कम्युनिस्ट पार्टीका नेता प्रमेश हमालले प्रतिपक्षी दलहरूले एकमत भएर संसद् बैठक तत्काल आह्वान गर्न माग गर्ने निर्णय गरेको जानकारी दिए । उनका अनुसार बैठकमा समसामयिक राजनीतिक विषयमा गहन छलफल भएको थियो र नेपाली राजनीतिमा गम्भीर समस्या देखिएको महसुस गरिएको छ ।
हमालले राष्ट्रियतासम्बन्धी प्रश्न, जनताको जीविकोपार्जन, विपद्बाट पीडितले पाउनुपर्ने राहत तथा पुनर्निर्माणका विषयमा पनि बैठकमा गम्भीर छलफल भएको बताए । संसद् बैठकमार्फत यी सबै विषयमा खुला र गम्भीर बहस हुनुपर्ने प्रतिपक्षी दलहरूको भनाइ छ ।
