कर्णाली प्रदेशका पर्यटकीय गन्तव्यहरूमा पछिल्ला सात आर्थिक वर्षमा पाँच लाख ४० हजार ७२८ जना पर्यटकले भ्रमण गरेका छन् । उद्योग, पर्यटन, वन तथा वातावरण मन्त्रालयको तथ्याङ्कअनुसार यीमध्ये अधिकांश सुर्खेतका दुई गन्तव्यमा केन्द्रित छन् — बुलबुले ताल पुग्नेको संख्या दुई लाख ९४ हजार ४०१ र प्रदेश शहीद पार्क पुग्नेको एक लाख ४० हजार ३०० छ ।
मुगुको रारातालमा २४ हजार ९३१, सल्यानको कुपिण्डे दहमा झन्डै ११ हजार, डोल्पाको शे–फोक्सुण्डोमा सात हजार २२८ र काँक्रेविहारमा पाँच हजार ४६८ जनाले भ्रमण गरे । हुम्ला हवाई मार्गबाट चार हजार ५८९ र सुर्खेतको बयलकाँडामा २१५ जनाले प्याराग्लाइडिङ गरे ।
तर पर्यटक बढ्दा पूर्वाधार निर्माणको गति भने ढिलो छ । काँक्रेविहारको कम्पाउन्ड वाल आयोजना (सम्झौता एक करोड १८ लाख ५४ हजार रुपैयाँ, २०७८ चैत १२) को भौतिक प्रगति ५५ र वित्तीय ५० प्रतिशत मात्र छ; म्याद तीन पटक थपियो । रारा पूर्वाधारमा चार करोड ५२ लाख ९१ हजार रुपैयाँभन्दा बढीको सम्झौता भए पनि भौतिक प्रगति २० र वित्तीय ३२ प्रतिशत मात्र छ । रुकुम पश्चिमको खारा जनयुद्ध संग्रहालय (एक करोड २८ लाख ९६ हजार ७९३) को भौतिक ५८ र वित्तीय ५० प्रतिशत छ; म्याद दुई पटक थपिएको छ । चौहान पार्कमा दुई करोड २८ लाख ९७ हजार रुपैयाँभन्दा बढीको सम्झौता भए पनि भौतिक प्रगति ३० र वित्तीय २५ प्रतिशत मात्र छ ।
मन्त्री कल्याणी खड्काले कुपिण्डे क्षेत्रको संरक्षण र प्रवर्द्धनका लागि तीन करोड ६० लाख र पर्यटकसम्बन्धी कार्यक्रमका लागि एक करोड रुपैयाँ छुट्याइएको बताइन् । पर्यटन व्यवसायी जितेन्द्र झाँक्रीले आयोजना समयमै सम्पन्न गरी बजेटको प्रभावकारी प्रयोगमा जोड दिए ।
