स्वास्थ्य तथा खाद्य स्वच्छता मन्त्रालय र विज्ञान, प्रविधि तथा नवप्रवर्तन मन्त्रालयबीच सिंहदरबार वैद्यखानाको आधुनिकीकरण गर्ने विषयमा सहमति भएको छ। दुई मन्त्रीबीच भएको छलफलमा वैद्यखानाको संस्थागत तथा प्राविधिक क्षमता बढाउने र औषधि उत्पादनको गुणस्तर सुधार गर्ने विषयमा कुराकानी भएको हो।
स्वास्थ्य तथा खाद्य स्वच्छतामन्त्री निशा मेहता र विज्ञान, प्रविधि तथा नवप्रवर्तनमन्त्री महावीर पुनबीचको भेटमा वैद्यखानाको अनुसन्धान प्रयोगशाला विकास, औषधिको गुणस्तर सुधार, निर्यातको सम्भावना र विश्व स्वास्थ्य संगठनका मापदण्डअनुरूप उत्पादन प्रणालीको स्तरोन्नतिबारे छलफल भएको थियो।
छलफलमा वैद्यखानाको उत्पादन प्रणालीलाई व्यवस्थित, गुणस्तरीय र प्रतिस्पर्धी बनाउँदै संस्थागत क्षमता विकासका लागि दुवै मन्त्रालयले सहकार्य गर्ने विषयमा सहमति जुटेको छ। यसका लागि दुई मन्त्रालयबीच समझदारीपत्र गर्ने प्रस्तावसमेत अघि बढाइएको छ।
छलफलमा स्वास्थ्य तथा खाद्य स्वच्छता मन्त्रालयका सचिव डा. विकास देवकोटा र विज्ञान, प्रविधि तथा नवप्रवर्तन मन्त्रालयका सचिव दीनानाथ मिश्रको पनि सहभागिता थियो।
