सिरहामा समाचार प्रकाशित गरेको विषयलाई लिएर पत्रकारलाई घरमै पुगेर धम्की दिइएको घटनाप्रति नेपाल पत्रकार महासङ्घले गम्भीर आपत्ति जनाएको छ। महासङ्घले यस्तो व्यवहारलाई पत्रकारको सुरक्षा र स्वतन्त्र पत्रकारितामाथिको आक्रमणका रूपमा चित्रण गरेको छ।
सिरहास्थित अपन दैनिकका सञ्चारकर्मी श्यामकुमार यादवमाथि धम्की आएको हो। तस्करीसम्बन्धी भिडियो समाचार प्रकाशित भएपछि अजय यादव नामका व्यक्तिले उनको घरमै पुगेर धम्की दिएको महासङ्घको सिरहा शाखाले जनाएको छ। धम्की दिएको आरोप लागेका अजय यादव हाल प्रहरी नियन्त्रणमा रहेका छन्।
महासङ्घका महासचिव रामप्रसाद दाहालले शुक्रबार प्रेस विज्ञप्ति जारी गर्दै घटनाप्रति ध्यानाकर्षण गराएका हुन्। समाचारप्रति असहमति भए कानुनसम्मत बाटोबाट समाधान खोज्न सकिने अवस्था हुँदाहुँदै घरमै पुगेर धम्क्याउनु निन्दनीय र प्रेस स्वतन्त्रताविरोधी कार्य भएको महासङ्घको भनाइ छ।
महासङ्घले घटनाको निष्पक्ष छानबिन गरी धम्की दिने व्यक्तिमाथि प्रचलित कानुनबमोजिम कारबाही गर्न सम्बन्धित निकायसँग माग गरेको छ। साथै पत्रकारको सुरक्षा र स्वतन्त्र रूपमा काम गर्न पाउने वातावरण सुनिश्चित गर्न पनि सम्बन्धित निकायको ध्यानाकर्षण गराइएको छ।
