नेपाली कांग्रेसमा समानान्तर गतिविधि गर्दै आएको पूर्वसभापति शेरबहादुर देउवा समूहले तल्लो तहका अधिवेशन धमाधम सम्पन्न गर्दै जिल्ला अधिवेशनमा प्रवेश गरेको छ। समूहले अहिलेसम्म ११ जिल्लामा नयाँ नेतृत्व चयन गरिसकेको छ।
संखुवासभा, डोल्पा, हुम्ला, जुम्ला, मुगु, रुकुम पश्चिम, कालिकोट, डोटी, बैतडी, रोल्पा र दैलेखमा कार्यतालिकामा तोकिएको मितिअघि नै जिल्ला अधिवेशन सम्पन्न भएको समूहका नेताहरूले बताएका छन्। समूहले गत १५ असोजबाट वडा अधिवेशन सुरु गरेको थियो र १५ कात्तिकमा जिल्ला अधिवेशन गर्ने कार्यतालिका सार्वजनिक गरेको थियो। बाँकी जिल्लामा कार्यतालिकाअनुसार नै अधिवेशन हुने नेताहरूको भनाइ छ।
चुनदेवीस्थित सम्पर्क कार्यालयले उपलब्ध गराएको तथ्यांकअनुसार देउवा समूहले ६ हजार १०७ वडामा, ४८० पालिकामा र १७० प्रदेशसभा निर्वाचन क्षेत्रमा अधिवेशन सम्पन्न गरिसकेको छ। प्रतिनिधिसभा क्षेत्रीय तहमा पनि ८५ स्थानमा अधिवेशन भएको तथ्यांकमा उल्लेख छ।
यता, कांग्रेसले गत असोजमा १५औं महाधिवेशन सम्पन्न गरेर गगन थापालाई सभापति चयन गरिसकेको छ। नवनिर्वाचित केन्द्रीय कार्यसमितिले बिहीबार पद तथा गोपनीयताको शपथ लिएको छ। महामन्त्री प्रदीप पौडेलले अब बस्ने पहिलो केन्द्रीय कार्यसमिति बैठकमा देउवा समूहको समानान्तर गतिविधिबारे छलफल गरेर संस्थागत निर्णय लिइने बताएका छन्। देउवा समूहले भने सर्वोच्च अदालतले पार्टीको आधिकारिकतासम्बन्धी फैसलाको पुनरावलोकनका लागि दिएको अनुमतिलाई आधार मानेर अधिवेशन गरिरहेको छ।
