भोटेकोशी र त्रिशूली नदीमा आएको विनाशकारी बाढीबाट प्रभावित परिवारको राहत र पुनःस्थापनाका लागि नेपालले २१.६ मिलियन अमेरिकी डलर अनुदान पाउने भएको छ। यो रकम नेपाली रुपैयाँमा करिब पौने तीन अर्ब बराबर हुनेछ। संयुक्त राष्ट्रसंघीय जलवायु परिवर्तनसम्बन्धी संरचनाअन्तर्गतको हानि–नोक्सानी सम्बोधन कोषले नेपाललाई उक्त सहयोग उपलब्ध गराउने निर्णय गरेको हो।
गत भदौ १० गते आएको भयानक बाढीलाई सरकारले हिमालयन सुनामीका रूपमा उल्लेख गरेको थियो। बाढीले ठूलो मानवीय र आर्थिक क्षति पुर्याएको भन्दै सरकारले गत ३१ अगस्टमा कोषको बोर्डसमक्ष विशेष आर्थिक सहयोगका लागि आग्रह गरेको थियो। सोही आग्रहअनुसार गत १२ अक्टोबरमा बसेको बोर्डको विशेष बैठकले नेपाललाई क्षतिपूर्ति अनुदान दिने निर्णय गरेको परराष्ट्र मन्त्रालयले शुक्रबार पत्रकार सम्मेलनमार्फत जानकारी दिएको हो।
यसैबीच, आगामी ९ देखि २० नोभेम्बरसम्म टर्कीको अन्तालियामा हुने विश्व जलवायु सम्मेलन (कोप–३१) मा नेपालको उच्चस्तरीय सहभागिता रहने मन्त्रालयले जनाएको छ। सम्मेलनको तयारी तीव्र गतिमा अघि बढाइएको छ। कोप–३१ का क्रममा नेपाल र दक्षिण कोरियाबीच जलवायु परिवर्तनसम्बन्धी सहकार्यका लागि फ्रेमवर्क सम्झौतामा हस्ताक्षर गर्ने गरी आन्तरिक तयारी भइरहेको छ। सम्मेलनका छेउछाउका छलफलमा नेपालले अन्य पर्वतीय मुलुकसँग मिलेर जलवायु परिवर्तन र पर्वतीय विषयमा छलफल गर्ने तयारी गरेको छ।
