अख्तियार दुरुपयोग अनुसन्धान आयोगले सिरहाको गोलबजार नगरपालिकामा राजस्व हिनामिना भएको आरोपमा तत्कालीन नगरप्रमुखसहित ६ जनाविरुद्ध भ्रष्टाचार मुद्दा दायर गरेको छ। मुद्दामा पूर्वनगरप्रमुख देवनाथ साह तेली, उपप्रमुख रेशमकुमारी थापा, तत्कालीन प्रमुख प्रशासकीय अधिकृत श्रीधर केसी, निमित्त प्रमुख प्रशासकीय अधिकृत रामनारायण महतो, राजस्व शाखा प्रमुख दिनेश कुमार सहनी र ठेकेदार वीरेन्द्र कुमार यादव प्रतिवादी छन्।
आयोगका अनुसार आर्थिक वर्ष २०७७/७८ मा वडा नम्बर ६ र ७ मा लाग्ने पशु हाटबजार, बाख्रा हाटबजार र गुद्री हाटबजारको राजस्व उठाउने जिम्मा ठेकेदार यादवलाई अमानतमा दिइएको थियो। तर कार्यपालिकाको निर्णय र कानुनविपरीत राजस्वमा छुट दिइएको, ठेक्कासम्बन्धी विवाद मिलाउने क्रममा एक व्यक्तिलाई रकम दिएर हिनामिना गरिएको र सम्झौताबिना अग्रिम राजस्व उठाइएको आरोप छ। नगरसभाबाट मात्र दिन मिल्ने कर छुटको अधिकार प्रयोग गर्दै ७३ लाख ३४ हजार ९१३ रुपैयाँ छुट दिइएको आयोगले जनाएको छ।
अमानतमा उठाउनुपर्ने रकम ठेकेदारलाई नै दिइएको र ठेकेदारबाट असुल गर्नुपर्ने रकम पनि नउठाइ सरकारी सम्पत्तिमा नोक्सानी पुर्याइएको आरोपपत्रमा उल्लेख छ। आयोगले तेली, थापा, केसी र यादवविरुद्ध जनही एक करोड ६० लाख ४६ हजार ३४४ रुपैयाँ १० पैसा र महतो तथा सहनीविरुद्ध जनही एक करोड ३३ लाख ११ हजार ४३१ रुपैयाँ १० पैसा बिगो कायम गर्दै भ्रष्टाचार निवारण ऐन, २०५९ बमोजिम सजाय मागेको छ।
