मकवानपुरको हेटौंडा उपमहानगरपालिका–८ स्थित ओमनगर गेट नजिकै एक प्रहरी सहायक हवल्दार मृत अवस्थामा फेला परेका छन्। मंगलबार बिहान करिब साढे चार बजे उनी झुन्डिएको अवस्थामा भेटिएका हुन्।
बिहान घुम्न निस्किएका एक व्यक्तिले उनलाई त्यस अवस्थामा देखेपछि इलाका प्रहरी कार्यालय पशुपतिनगरमा खबर गरेका थिए। खबर पाएलगत्तै प्रहरी टोली घटनास्थलमा पुगेको थियो।
मृतक गोरखाको आरुघाट गाउँपालिका–३ पोखरीटोलका स्थायी बासिन्दा ३५/३६ वर्षीय अर्जुन गुरुङ हुन्। उनी हाल लमजुङस्थित इलाका प्रहरी कार्यालय भोटेओडारमा कार्यरत थिए।
जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्रीका अनुसार गुरुङ किन हेटौंडा पुगेका थिए भन्ने कुरा अहिलेसम्म खुल्न सकेको छैन। घटनास्थलबाट सुसाइड नोटसमेत फेला परेको प्रहरीले जनाएको छ।
प्रहरीले घटनाबारे थप अनुसन्धान गरिरहेको छ। नोटमा के लेखिएको छ र घटनाको पृष्ठभूमि के हो भन्नेबारे अनुसन्धानपछि मात्रै थाहा हुने प्रहरीको भनाइ छ।
