तनहुँको म्याग्दे गाउँपालिकामा सयपत्री फूलको खेती उल्लेख्य रूपमा विस्तार भएको छ। गाउँपालिकाले किसानलाई लागतको ७५ प्रतिशतसम्म अनुदान दिएपछि चालु वर्ष पालिकाका विभिन्न वडामा गरी २० दशमलव पाँच रोपनी क्षेत्रफलमा सयपत्री लगाइएको हो।
सबैभन्दा धेरै खेती वडा नम्बर ४ को छिम्लीश्वारामा भएको छ, जहाँ चण्डेश्वरी फलफूल तथा तरकारी उत्पादक कृषक समूहले सामूहिक रूपमा १६ रोपनीमा फूल लगाएको छ। सोही वडाका घन विक्रम आलेले दुई रोपनी, वडा नम्बर ६ सिम्लेका सन्तोष श्रेष्ठले दुई रोपनी र वडा नम्बर ५ थाङ्दीकी सविना थापाले आधा रोपनीमा सयपत्री रोपेका छन्।
गत वर्ष समूहले छ रोपनीमा मात्र फूल लगाएको थियो। उत्पादनले बजारमा राम्रो माग पाएपछि यस वर्ष क्षेत्रफल बढाएर १६ रोपनी पुर्याइएको समूहकी अध्यक्ष जितमाया रानाले बताइन्। बिक्रीमा कठिनाइ नभएपछि किसानमा थप उत्साह जागेको उनको भनाइ छ।
गाउँपालिका अध्यक्ष श्रीप्रसाद श्रेष्ठका अनुसार पालिकाभित्र चाहिने फूल स्थानीयस्तरमै उत्पादन गरेर बाहिरबाट आउने फूलको निर्भरता घटाउने उद्देश्यले अनुदान कार्यक्रम चलाइएको हो। स्थानीय उत्पादन बढाउँदै किसानको आम्दानी उकास्ने र पालिकालाई फूलमा आत्मनिर्भर बनाउने लक्ष्य रहेको उनले बताए।
तिहारका बेला सयपत्री फूलको माग निकै बढ्ने गर्छ। घर, मन्दिर तथा पूजाआजामा फूल र मालाको प्रयोग हुने भएकाले यस समयमा खपत उच्च हुन्छ। मागअनुसार स्थानीय उत्पादन पर्याप्त नहुँदा विगतमा बाहिरबाट फूल ल्याउनुपर्ने अवस्था थियो। तिहारमा भारतबाट फूल आउने गरेको स्मरण गर्दै किसानले स्थानीय उत्पादनको बिक्रीवितरणको व्यवस्था मिलाउनुपर्ने माग गरेका छन्।
अनुदान पाएपछि आफू पनि फूलखेतीमा लागेको सिम्लेका किसान सन्तोष श्रेष्ठले बताए। स्थानीय सरकारको सहयोगले नयाँ खेती गर्न हौसला मिलेको उनको भनाइ छ। तरकारी तथा फलफूल खेती गर्दै आएका किसानसमेत फूलखेतीतर्फ आकर्षित हुन थालेका छन्। गाउँपालिकाले आगामी दिनमा पनि यो कार्यक्रमलाई निरन्तरता दिने जनाएको छ।
