भारतीय फिल्म ‘रामायण’ प्रदर्शनमा आउनुअघि नै बक्स अफिसमा इतिहास रच्ने बाटोमा लागेको छ। विश्वभर अग्रिम टिकट बिक्रीबाट फिल्मले १०५ करोड भारू बटुलिसकेको भारतीय सञ्चारमाध्यमले जनाएका छन्।
हिन्दुस्तान टाइम्सका अनुसार मंगलबार बिहानसम्म भारतभित्र मात्र अग्रिम बिक्रीबाट ५८ करोड भारू संकलन भइसकेको छ। त्यसमा पहिलो दिनका टिकटबाट मात्र २७ करोड भारू आम्दानी भएको छ भने देशभर करिब १५ लाख टिकट बिक्री भइसकेका छन्। भारतबाहिरको बजारमा पनि उत्साह उस्तै देखिएको छ — उत्तर अमेरिकासहित अन्तर्राष्ट्रिय बजारबाट अग्रिम बिक्रीमा ५० लाख अमेरिकी डलर उठेको छ।
यससँगै ‘रामायण’ अग्रिम बुकिङबाट १०० करोड भारूभन्दा बढी कमाउने फिल्महरूको सूचीमा परेको छ। यसअघि ‘बाहुबली २’, ‘आरआरआर’, ‘पुष्पा २’ र ‘धुरन्धर २’ मात्र यो सूचीमा थिए। अग्रिम बिक्रीको यो गतिले फिल्मले पहिलो दिनमै ठूलो व्यापार गर्ने अनुमान गरिएको छ।
नितेश तिवारीको निर्देशनमा बनेको फिल्ममा रणवीर कपूर राम, साई पल्लवी सीता र यश रावणको भूमिकामा छन्। रवि दुबे लक्ष्मण र सनी देओल हनुमानको भूमिकामा देखिनेछन्। फिल्मको पहिलो भाग नोभेम्बर ५ (कात्तिक १९) देखि विश्वभर प्रदर्शन हुँदैछ भने दोस्रो भाग सन् २०२७ को दीपावलीमा आउने तयारी छ।
