काठमाडौं — जनता समाजवादी पार्टी नेपालका दर्जनौँ नेता तथा कार्यकर्ता नेपाली कम्युनिस्ट पार्टी (नेकपा) मा प्रवेश गरेका छन्। बाँकेका ती नेता–कार्यकर्ता जसपा नेपालका केन्द्रीय सदस्य राजकिशोर मिश्राको नेतृत्वमा नेकपामा आएका हुन्।
मंगलबार पार्टी केन्द्रीय कार्यालयमा आयोजित एक कार्यक्रममा उनीहरूले नेकपाको सदस्यता लिएका छन्। कार्यक्रममा नेकपाका संयोजक पुष्पकमल दाहाल ‘प्रचण्ड’ले नवप्रवेशी नेता तथा कार्यकर्तालाई स्वागत गर्दै पार्टी सदस्यता प्रदान गरेका थिए।
मिश्राको नेतृत्वमा प्रवेश गर्ने समूहमा बाँके जिल्लाका दर्जनौँ नेता तथा कार्यकर्ता सहभागी थिए। उनीहरूको आगमनसँगै बाँकेमा नेकपाको संगठन थप बलियो हुने पार्टीको अपेक्षा छ।
पछिल्लो समय विभिन्न दलबाट नेता–कार्यकर्ता नेकपामा प्रवेश गर्ने क्रम जारी छ। यस्ता प्रवेश कार्यक्रममार्फत पार्टीले आफ्नो संगठन विस्तार गर्ने प्रयास गरिरहेको छ।
