बागलुङ — राष्ट्रिय स्वतन्त्र पार्टीका स्थानीय नेताको घरमा प्रहरीले छापा हानेर तास खेलिरहेका नौ जनालाई नियन्त्रणमा लिएको छ।
बागलुङ बजारस्थित रास्वपा नेता अमर खड्काको निवासमा तास खेलिरहेको सूचना पाएपछि प्रहरी निरीक्षक चिरञ्जीवी अधिकारीको नेतृत्वमा खटिएको टोलीले छापा हानेको हो। छापाका क्रममा खड्कासहित नौ जना पक्राउ परेका हुन्। उनीहरूको साथबाट एक लाख ६४ हजार नौ सय २५ रुपैयाँ नगद बरामद भएको प्रहरीले जनाएको छ।
पक्राउ परेकामा बागलुङ नगरपालिका–२ का ४२ वर्षीय चिरञ्जीवी शर्मा, ६३ वर्षीय रिपोर्ट जिसी, ५० वर्षीय दुर्गा बहादुर खत्री र ३५ वर्षीय हरी शर्मा छन्। त्यस्तै, नगरपालिका–३ का ६६ वर्षीय भीमबहादुर खत्री, ६६ वर्षीय डम्मर बहादुर भण्डारी, नगरपालिका–१ का ५५ वर्षीय राजु गौतम र वडा नम्बर ८ का ५६ वर्षीय केशव पराजुली पनि पक्राउ परेका छन्।
प्रहरीका अनुसार पक्राउ परेकाहरूमा नेता, वकिल र स्वास्थ्यकर्मी समेत छन्। उनीहरूमाथि थप अनुसन्धान भइरहेको प्रहरीले जनाएको छ।
खड्का यसअघिको प्रतिनिधि सभा निर्वाचनअघि नेपाली कांग्रेस छाडेर रास्वपामा आबद्ध भएका थिए। उनी हाल बागलुङ नगरपालिकाको पार्टी वडा सभापति छन्।
