जाजरकोटको नलगाड नगरपालिका–७ दल्लीमा माटो खन्ने क्रममा माथिबाट ढिस्को खस्दा चार जना घाइते भएका छन्। घर पोत्नका लागि माटो लिन गएका उनीहरू एकैपटक खसेको ढिस्कोमा पुरिएका थिए।
घाइते हुनेहरू रुकुम पश्चिमको आठबिसकोट नगरपालिका–११ चौरका स्थानीय हुन्। उनीहरू माटो खन्न दल्ली पुगेका बेला माथिबाट ठूलो ढिस्को खसेर उनीहरूलाई पुरेको थियो।
घाइते चारै जनालाई स्थानीय नगर अस्पतालमा भर्ना गरी उपचार भइरहेको छ। तीमध्ये एक जनाको अवस्था गम्भीर रहेकाले प्राथमिक उपचारपछि थप उपचारका लागि सुर्खेत पठाइएको छ। अन्य तीन जनाको स्थानीय अस्पतालमै उपचार भइरहेको छ।
घटनाबारे आठबिसकोट नगरपालिकाका प्रमुख डम्बर रावतले जानकारी दिएका हुन्। घर पोत्ने माटो खन्न गएका बेला एक्कासि ढिस्को खस्दा उनीहरू घाइते भएको उनले बताए।
