देशकै ठूलो जीवन बीमा कम्पनी नेपाल लाइफ इन्स्योरेन्सको क्रेडिट रेटिङ एक तह माथि उक्लिएको छ। इक्रा नेपालले कम्पनीलाई दिँदै आएको जारीकर्ता रेटिङ डबल ए माइनसबाट डबल एमा स्तरोन्नति गरेको हो।
इक्रा नेपालले कम्पनीको आर्थिक अवस्था, सोल्भेन्सी, लगानीको संरचना र प्रतिफल, बजारमा बलियो उपस्थिति र व्यवस्थापनको सबलता मूल्याङ्कन गरेर रेटिङ बढाएको जनाएको छ।
नेपाल लाइफ यसअघि इक्रा नेपालबाट डबल ए माइनस रेटिङ पाउने पहिलो जीवन बीमा कम्पनी बनेको थियो। उक्त रेटिङ थप एक तह माथि पुग्नुलाई कम्पनीको निरन्तर आर्थिक सुदृढीकरण र संस्थागत उत्कृष्टताको ठूलो उपलब्धि मानिएको छ।
पछिल्लो मूल्याङ्कनअनुसार कम्पनीको सोल्भेन्सी अनुपात अघिल्लो अवधिको करिब १४५ प्रतिशतबाट सुधार भएर करिब १५४ प्रतिशत पुगेको छ, जुन नियामक निकायले तोकेको न्यूनतम १३० प्रतिशतभन्दा माथि हो। कम्पनीले सरकारी सुरक्षणमा लगानी बढाउँदै मुद्दती निक्षेपमा रहेको लगानीको एकाग्रता घटाएर पोर्टफोलियो थप विविधीकृत र सुदृढ बनाएको छ।
आर्थिक वर्ष २०२५/२६ मा कुल बीमा शुल्क आर्जनका आधारमा कम्पनीको बजार हिस्सा करिब २७ प्रतिशत रहेको छ। सो अवधिमा कम्पनीले करिब ५४ अर्ब रुपैयाँ बीमा शुल्क आर्जन गरेको छ भने जीवन बीमा कोष करिब २७३ अर्ब र पोलिसी लोनसहित कुल लगानी करिब २८५ अर्ब रुपैयाँ पुगेको छ।
सन् २००१ देखि सञ्चालनमा रहेको नेपाल लाइफले जुलाई २०२६ मध्यसम्म देशभर १९६ शाखा, उपशाखा तथा क्षेत्रीय कार्यालयमार्फत सेवा प्रवाह गर्दै आएको छ। कम्पनीसँग नेपाल पुनर्बीमा कम्पनी र हिमालयन रिइन्स्योरेन्ससँग पर्याप्त पुनर्बीमा व्यवस्था र करिब १ अर्ब ५४ करोड रुपैयाँको विपद् जगेडा कोष रहेको छ। प्रमुख कार्यकारी अधिकृत प्रवीण रमण पराजुलीले रेटिङ स्तरोन्नतिलाई कम्पनीको निरन्तर सुधार, संस्थागत सुशासन र वित्तीय अनुशासनको प्रतिफलका रूपमा लिएका छन्।
