चीनका विदेशमन्त्री वाङ यीले दक्षिण चीन सागरको विवादमा सतर्क रहन फिलिपिन्सलाई आग्रह गरेका छन्। उनले चीनसँगको सम्बन्धमा हस्तक्षेप गर्ने व्यक्तिमाथि नियन्त्रण गर्न पनि फिलिपिन्सलाई सुझाव दिएका छन्।
मंगलबार राति भएको टेलिफोन वार्तामा वाङ र फिलिपिन्सकी विदेशमन्त्री थेरेसा लाजारोबीच दुई देशको सम्बन्ध र क्षेत्रीय विवादबारे छलफल भएको थियो। दुवै पक्षले कूटनीतिक संवाद जारी राख्ने र आपसी सम्मानका आधारमा मतभेद समाधान गर्ने सहमति जनाएका छन्।
दक्षिण चीन सागरको स्वामित्वलाई लिएर चीन र फिलिपिन्सबीच पछिल्ला वर्षहरूमा तनाव बढ्दै गएको छ। यसैबीच, फिलिपिन्सका लागि चिनियाँ राजदूतले चीनले चाहे बल प्रयोग गरेर सजिलै जित्न सक्ने अभिव्यक्ति दिएपछि राष्ट्रपति फर्डिनान्ड मार्कोस जुनियरले त्यसलाई धम्कीका रूपमा लिएका थिए।
वार्तामा रिड ब्यांक क्षेत्रमा रोकिएको संयुक्त तेल तथा ग्यास अन्वेषणसम्बन्धी छलफल पुनः सुरु गर्ने सम्भावनाबारे पनि कुराकानी भएको फिलिपिन्सका एक अधिकारीले बताएका छन्। उक्त क्षेत्र फिलिपिन्सको विशेष आर्थिक क्षेत्रभित्र पर्ने भए पनि चीनले समेत दाबी गर्दै आएको छ।
दक्षिण चीन सागरको विवादमा भियतनाम, मलेसिया, ब्रुनाई र ताइवान पनि संलग्न छन्। विश्व व्यापारका लागि महत्त्वपूर्ण समुद्री मार्ग रहेको यस क्षेत्रमा क्षेत्रीय दाबीका कारण तनाव कायम छ।
