सोलुखुम्बुको फेरिचेमा दुई हेलिकप्टर एकापसमा ठोक्किएको घटनाको छानबिन गर्न नेपाल नागरिक उड्डयन प्राधिकरणले पाँच सदस्यीय समिति बनाएको छ। मंगलबार भएको दुर्घटनामा एक जनाको ज्यान गएको थियो भने दुई पाइलट र एक यात्रु घाइते भएका थिए।
फेरिचेमा एयर डाइनेस्टीको ९एन-एओडी र फिस्टेल एयरको ९एन-एजेआर हेलिकप्टर अवतरणका क्रममा ठोक्किएका थिए। घाइतेहरूको उपचार जारी छ।
प्राधिकरणले निर्देशक प्रभाकरचन्द्र मल्लिकको संयोजकत्वमा छानबिन समिति गठन गरेको हो। समितिमा पाइलट र वायुयान इन्जिनियर पनि छन्।
समितिले दुर्घटनाको कारण र त्यस पछाडिका कारक तत्वहरूको अध्ययन तथा विश्लेषण गर्नेछ। भविष्यमा यस्ता घटना दोहोरिन नदिन आवश्यक सुझावसहितको प्रतिवेदन तयार पारेर बुझाउने जिम्मेवारी समितिलाई दिइएको छ।
खुम्बु क्षेत्रमा हवाई उडानको चाप उच्च हुने भएकाले छानबिनको निष्कर्षले त्यहाँको हवाई सुरक्षामा सुधार ल्याउने अपेक्षा गरिएको छ।
