तनहुँको म्याग्दे गाउँपालिका–४ छिम्लीश्वाराका बारी अहिले सयपत्री फूलले पहेँलपुर देखिएका छन्। बारीभरि फुलेका फूल हेर्दा रमाइलो लाग्छ, तर यहाँका किसानका लागि त्यही सुन्दरता चिन्ताको विषय बनेको छ। यस वर्ष तिहार ढिलो परेकाले दसैँलगत्तै फुलेको फूल तिहारसम्म बिक्री गर्न सकिने हो कि होइन भन्ने अन्योल उनीहरूमा छ।
छिम्लीश्वाराका २३ जना किसान चण्डेश्वरी फलफूल तथा तरकारी कृषक समूहमा आबद्ध छन्। समूहकी अध्यक्ष जितमाया रानाका अनुसार गत वर्ष तिहार छिटो परेको थियो र फूल राम्ररी बिक्री भएको थियो। मागअनुसार फूल पुर्याउनै नसकिएको अनुभवले किसानलाई यसपटक खेती विस्तार गर्न प्रेरित गर्यो। गत वर्ष ६ रोपनीमा गरिएको खेती यस वर्ष १६ रोपनीमा पुगेको छ।
गत वर्ष समूहले सयपत्री बिक्री गरेर चार लाख ५० हजार रुपैयाँ आम्दानी गरेको थियो। फूल प्रतिकिलो तीन सय रुपैयाँका दरले बिक्री गरिएको थियो। यस वर्ष किसानले १५ लाख रुपैयाँ बराबरको फूल बिक्री गर्ने लक्ष्य राखेका छन्। तर फूल फुल्ने समय र तिहारको मितिबीच तालमेल नमिल्दा लक्ष्य पूरा हुनेमा उनीहरू ढुक्क हुनसकेका छैनन्।
यसअघि यहाँका किसानले बारीमा मकै, मास र बोडी लगाउँथे। मिहिनेत धेरै गर्नुपर्ने भए पनि आम्दानी अपेक्षाअनुसार नहुने भएपछि उनीहरूले गत वर्षदेखि सामूहिक रूपमा सयपत्री खेती सुरु गरेका थिए। विदेशबाट फूल आयात हुने देखेपछि आफ्नै ठाउँमा उत्पादन गरेर स्थानीय माग पूरा गर्ने सोचले यो खेती थालिएको हो।
फूलखेतीमा अर्को समस्या बिचौलिया पनि हो। गत वर्ष प्रतिकिलो तीन सय रुपैयाँमा बिक्री गरेका किसानका अनुसार उनीहरूसँग फूल किनेर लैजाने व्यापारीले उपभोक्तालाई बढी मूल्यमा बिक्री गरेका थिए। त्यसैले किसानले हाटबजारको व्यवस्था गर्नुपर्ने माग गरेका छन्। समूहकी कोषाध्यक्ष सन्सरी रानाका अनुसार फूल छिटै फुलेकाले बजारमा मूल्य पाउँछौँ कि पाउँदैनौँ भन्ने चिन्ता छ।
