कोरोनाभाइरस महामारीबारे झुटो सूचना फैलाएको र मानहानि गरेको आरोपमा चीनको एक अदालतले अमेरिकी राज्य मिसौरीविरुद्ध दायर मुद्दाको औपचारिक सुनुवाइ सुरु गरेको छ। हुबेई प्रान्तको वुहान इन्टरमिडिएट पिपुल्स कोर्टले मंगलबार जारी सूचनामार्फत मुद्दा स्वीकार गरी कारबाही अघि बढाएको जानकारी दिएको हो। समाचार एजेन्सी रोयटर्सका अनुसार मुद्दा वुहान नगर सरकार, वुहान इन्स्टिच्युट अफ भाइरोलोजी र बेइजिङस्थित चाइनिज एकेडेमी अफ साइन्सेजले संयुक्त रूपमा दायर गरेका हुन्।
मुद्दामा मिसौरी राज्यसँगै त्यहाँका पूर्व महान्यायाधिवक्ता एरिक स्मिट र एन्ड्रयु बेली तथा वर्तमान महान्यायाधिवक्ता क्याथरिन हानावेलाई विपक्षी बनाइएको छ। वादी पक्षले विपक्षीहरूले अमेरिकामा चीनविरुद्ध दुर्भावनापूर्ण र अनुचित कानुनी लडाइँ चालेको, महामारीसँग सम्बन्धित मनगढन्ते र झुटो सूचना फैलाएको तथा लाञ्छनायुक्त एवं विभेदकारी टिप्पणी गरेको आरोप लगाएका छन्। यस्ता गतिविधिले वादी निकायहरूको प्रतिष्ठामा गम्भीर आघात पुर्याएको र ठूलो आर्थिक क्षति भएको दाबी रिटमा गरिएको छ।
चिनियाँ पक्षले मिसौरी राज्य र सम्बन्धित अधिकारीहरूले सार्वजनिक रूपमा माफी माग्नुपर्ने, संस्थाको प्रतिष्ठा पुनर्स्थापित गर्नुपर्ने र भएको क्षतिको क्षतिपूर्ति तिर्नुपर्ने माग राखेका छन्। हङकङको पत्रिका साउथ चाइना मर्निङ पोस्टका अनुसार चिनियाँ पक्षले ३५६.४४ अर्ब युआन, करिब ५३.४४ अर्ब अमेरिकी डलर बराबरको क्षतिपूर्ति माग गरेको छ। यस विषयमा मिसौरी महान्यायाधिवक्ताको कार्यालयले तत्काल कुनै प्रतिक्रिया दिएको छैन।
यो मुद्दा अमेरिका र चीनबीच सन् २०२० देखि चलेको कानुनी विवादको पछिल्लो शृङ्खला हो। अप्रिल २०२० मा मिसौरी राज्यले महामारीबाट राज्यलाई पुगेको आर्थिक क्षतिको जिम्मेवार चीनलाई ठहर गर्दै हुबेई प्रान्त र अन्य चिनियाँ निकायविरुद्ध अमेरिकामा पहिलो पटक मुद्दा दायर गरेको थियो। चीनमा सुरु भएको सुनुवाइलाई त्यसैको कानुनी प्रतिउत्तरका रूपमा हेरिएको छ।
