सिड्नी । भिक्टोरिया राज्यको वाङ्गारट्टामा स्वतन्त्र सांसद हेलेन हेन्स आफ्नै कार्यालयबाहिर कारको ठक्करमा गम्भीर घाइते भएकी छन्। घटनास्थलबाट प्रहरीले ४३ वर्षीय एक पुरुषलाई पक्राउ गरेको छ र एउटा चक्कु पनि बरामद गरेको छ।
हेन्सलाई नियतवश नै निसाना बनाइएको हो वा होइन भन्ने प्रहरीले अहिलेसम्म पुष्टि गरेको छैन। तर प्रधानमन्त्री एन्थोनी अल्बालिजले यसलाई नियतवश गरिएको आक्रमणका रूपमा चित्रण गरेका छन्। सङ्घीय प्रहरीको प्रतिआतङ्कवाद टोलीले राज्य प्रहरीलाई अनुसन्धानमा सहयोग गरिरहेको छ। राष्ट्रिय प्रसारण संस्थासँग कुरा गर्दै अल्बालिजले भने, “यो दुर्घटना थिएन, यो नियतवश गरिएको कार्यजस्तै देखिन्छ।”
विश्वभर राजनीतिज्ञमाथि हिंसाका घटना बढिरहेका बेला अस्ट्रेलियामा पनि सांसदहरूलाई खतरा बढेको चेतावनी दिइँदै आएको थियो। अस्ट्रेलियालाई प्रायः शान्त र सभ्य राजनीतिक संवाद भएको समाज मानिन्छ, तर पछिल्लो समय ध्रुवीकरण चर्किँदै गएको सांसदहरूले बताउँदै आएका छन्।
यसै वर्षको सुरुमा प्रधानमन्त्री अल्बालिज स्वयं बमको धम्कीपछि सरकारी निवासबाट सुरक्षित स्थानमा सारिएका थिए। गत अगस्टसम्म उनलाई ज्यान मार्ने धम्की दिएको अभियोगमा करिब २० मुद्दा विभिन्न अदालतमा विचाराधीन थिए।
