फ्रान्समा जारी हिंसात्मक प्रदर्शनबीच च्याम्पियन्स लिगको बहुप्रतीक्षित भिडन्त नरोकिने भएको छ। मंगलबार पेरिसको पार्क डे प्रिन्सेसमा हुने पेरिस सेन्ट–जर्मेन (पीएसजी) र बार्सिलोनाबीचको खेल निर्धारित समयमै हुने फ्रान्सका गृहमन्त्री लरेन्ट नुनेजले पुष्टि गरेका छन्।
सप्तान्तमा फ्रान्सभर हिंसात्मक प्रदर्शन भएका थिए। विद्यालयको बजेट कटौतीविरुद्ध विद्यार्थीबाट सुरु भएको आन्दोलन महँगो जीवनयापन, सरकारी खर्च कटौती र घट्दो सार्वजनिक सेवाविरुद्धको असन्तुष्टिमा परिणत भएको छ। प्रदर्शनका क्रममा पेरिस, मार्से र लियोनसहित विभिन्न सहरमा दंगा, लुटपाट र सार्वजनिक भवनमा आक्रमण भएका थिए। प्रहरीले देशभर दुई हजारभन्दा बढी प्रदर्शनकारीलाई पक्राउ गरेको छ।
प्रधानमन्त्री सेबास्टियन लेकोर्नुले सहरहरूमा आंशिक र स्थानीयकृत कर्फ्यू लगाउन निर्देशन दिएका छन्। राष्ट्रपति इम्यानुएल म्याक्रोनले आइतबार टेलिभिजन सम्बोधन गर्दै हिंसाको निन्दा गरेका थिए।
उच्चस्तरीय सुरक्षा बैठकपछि मन्त्री नुनेजले खेल स्थगनको सम्भावनाबारे छलफल भए पनि पीएसजी–बार्सिलोना खेलमा त्यो लागू नहुने बताए। बुधबार लिल र गालातासारेबीचको खेल पनि प्रभावित नहुने उनले जनाए। पीएसजीका प्रशिक्षक लुइस एनरिकेले आफू फुटबलबारे मात्र बोल्ने भन्दै हिंसा मन नपरेको प्रतिक्रिया दिएका छन्।
