काठमाडौं — ऊर्जा, जलस्रोत तथा सिँचाइमन्त्री विराजभक्त श्रेष्ठ र भारतका विदेश सचिव विक्रम मिश्रीबीच ऊर्जा सहकार्य विस्तार गर्ने विषयमा छलफल भएको छ। ऊर्जा मन्त्रालयमा मंगलबार भएको शिष्टाचार भेटमा दुई देशबीच विद्युत् व्यापार, जलविद्युत् आयोजना निर्माण, विपद् प्रतिकार्य र पूर्वसूचना प्रणालीजस्ता विषयमा कुराकानी भएको मन्त्रीको सचिवालयले जनाएको छ।
भेटका क्रममा मन्त्री श्रेष्ठले नेपालले हालै भोगेका शृङ्खलाबद्ध विपद्का घटनामा भारतले गरेको सहयोगका लागि धन्यवाद दिए। उनले दुई देशबीच विद्युत् व्यापार विस्तार गर्न, नेपालमा निर्माणाधीन जलविद्युत् आयोजनाहरू समयमै सम्पन्न गर्न र ऊर्जा क्षेत्रमा निजी लगानी बढाउन भारतसँग सहकार्य गर्न आग्रह गरे।
जवाफमा भारतीय विदेश सचिव मिश्रीले ऊर्जा क्षेत्रमा नेपालसँग सहकार्य गर्न भारत तयार रहेको बताए। छलफलमा ऊर्जा सचिव डा. जगदीश्वर कर्माचार्यसहित मन्त्रालयका अधिकारीहरूको सहभागिता थियो भने भारतीय पक्षबाट नेपालका लागि भारतीय राजदूत सुधाकर दलेला र भारतीय विदेश मन्त्रालयका अतिरिक्त सचिव मनु महावर सहभागी थिए।
नेपाल र भारतबीच ऊर्जा व्यापार तथा जलविद्युत् विकासमा सहकार्य लामो समयदेखि हुँदै आएको छ। पछिल्लो भेटले दुई देशबीचको ऊर्जा साझेदारीलाई थप मजबुत बनाउने अपेक्षा गरिएको छ।
