आईसीसी क्रिकेट विश्वकप लिग–२ को अन्तिम खेलमा पराजय भोगे पनि ओमानले सन् २०२७ को विश्वकप छनोटमा सोझै स्थान सुरक्षित गरेको छ। बुधबार भएको खेलमा संयुक्त अरब इमिरेट्स (यूएई) सँग सात विकेटले हारेको ओमान नेट रन रेटका आधारमा नामिबियाभन्दा अगाडि रहँदै शीर्ष चारमा अटाएको हो।
यूएईले पहिले ब्याटिङ गर्दै निर्धारित ५० ओभरमा आठ विकेट गुमाएर २२६ रन बनाएको थियो। यूएईका बासिल हमिदले सर्वाधिक ४३ रन जोडे भने ओमानका शाकिल अहमदले १० ओभरमा ४२ रन खर्चेर तीन विकेट लिए। २२७ रनको लक्ष्य पछ्याएको ओमानले ५० ओभरमा नौ विकेट गुमाएर १८४ रन मात्र बनाउन सक्यो।
खेलको सुरुवात ओमानका लागि निराशाजनक रह्यो। ११औँ ओभरसम्म २८ रन बनाउँदा उसले तीन विकेट गुमाइसकेको थियो। हम्माद मिर्जा र विनायक शुक्लाले इनिङ्स सम्हाल्ने प्रयास गरे पनि विकेट नियमित अन्तरमा झरिरह्यो। ६८ रनमा पाँच विकेट गुमाएको अवस्थामा मुजीबुर अली र नारायण सैशिवको साझेदारीले टोलीलाई १०३ रनको सीमापारि पुर्यायो। त्यही अङ्कले ओमानको शीर्ष चारमा रहने सम्भावना जीवित राख्यो।
यससँगै लिग–२ को शीर्ष चार टोलीको टुङ्गो लागेको छ। ४९ अङ्कसहित तालिकाको शीर्ष स्थानमा रहेको अमेरिका, स्कटल्यान्ड र नेदरल्यान्ड्सले यसअघि नै स्थान पक्का गरिसकेका थिए। ओमान चौथो टोलीका रूपमा छनोटमा सोझै पुगेको छ।
शीर्ष चारमा पर्न नसकेका नेपाल, नामिबिया, क्यानडा र यूएईले अब विश्वकप छनोट प्लेअफ खेल्नेछन्। उनीहरूसँगै च्यालेन्ज लिगबाट छनोट भएका जर्सी, इटाली, कुवेत र युगान्डा पनि प्रतिस्पर्धामा हुनेछन्। आठ टोलीबीचको प्लेअफ आगामी डिसेम्बर ४ देखि २१ सम्म नेपालमा हुनेछ, जसबाट चार टोली छनोट चरणमा पुग्नेछन्। त्यसपछि सन् २०२७ को एकदिवसीय विश्वकपमा पुग्ने टोलीको टुङ्गो लाग्नेछ।
