इस्लामाबाद। पाकिस्तानको उत्तरपश्चिमी प्रान्त खैबर पख्तुनख्वामा बुधबार प्रहरीसँगको भिडन्तमा दुई जना मारिएका छन्। मारिनेमा एक जना आत्मघाती आक्रमणकारी पनि रहेको प्रहरीले जनाएको छ। अर्का एक जना घाइते भएका छन्।
लाक्की मारवत जिल्लामा कालो सिसा भएको एउटा गाडी देखिएको सूचनाका आधारमा प्रहरी टोली त्यहाँ पुगेको थियो। टोली घटनास्थलमा पुग्दै गर्दा गाडीभित्र रहेका व्यक्तिहरूले गोली चलाउन थाले। त्यसपछि प्रहरीले गरेको प्रतिकारमा दुई जनाको मृत्यु भएको हो। घाइते भएका तेस्रा व्यक्ति भने घटनास्थलबाट भाग्न सफल भए।
उक्त गाडीको तलासी लिँदा हतियार तथा गोलीगठ्ठासँगै प्रतिबन्धित सङ्गठन तेहरीक–ए–तालिबान पाकिस्तान (टीटीपी) को झण्डा फेला परेको प्रहरीले बताएको छ। ती व्यक्तिहरू कुनै ठूलो आक्रमणको तयारीमा रहेको प्रारम्भिक अनुसन्धानले देखाएको छ।
समयमै कारबाही भएकाले सम्भावित आक्रमण टरेको प्रहरीको दाबी छ। भागेका व्यक्तिको खोजी र मारिएकाहरूको पहिचानका लागि आतङ्कवादविरोधी विभागसँग मिलेर खोजी अभियान चलाइएको छ।
