काठमाडौं – नेपाल प्रहरीका नवनियुक्त महानिरीक्षक डा. मनोजकुमार केसीले संगठनभित्रको संवेदनशील जानकारी बाहिर नजाओस् भन्नेमा कडा अडान लिएका छन्। प्रहरी प्रधान कार्यालयमा पदभार ग्रहण गरेपछि आयोजित विशेष कार्यक्रममा बोल्दै उनले आन्तरिक रणनीति र गोप्य सूचनाको संरक्षणलाई आफ्नो पहिलो प्राथमिकतामा राख्ने बताए।
अनधिकृत रूपमा सूचना बाहिरिने प्रवृत्तिप्रति कुनै छुट नदिइने उनको भनाइ थियो। प्रहरी कर्मचारीले संगठनप्रति पूर्ण निष्ठा राख्दै कुनै पनि प्रलोभन, प्रभाव वा दबाबमा नपरी काम गर्नुपर्नेमा उनले जोड दिए। नागरिकको अधिकारको रक्षा र कानुनी राज्यको पालना सुनिश्चित गर्न उच्च नैतिक आचरण र व्यावसायिक इमानदारी अपरिहार्य रहेको उनले बताए।
संगठनको छवि र जनताको भरोसा जोगाउन सबै प्रहरी कर्मचारी एकजुट भएर सरकार र नागरिकको अपेक्षाअनुसार अघि बढ्नुपर्ने उनको भनाइ छ। सेवाग्राहीप्रतिको व्यवहार र सेवाको गुणस्तर अहिलेको सबैभन्दा चर्चित र सुधार गर्नुपर्ने विषय भएको उल्लेख गर्दै उनले प्रहरीको व्यवहारलाई अझ जवाफदेही बनाउन निर्देशन दिए।
कर्मचारीको मनोबल बढाउन उपलब्ध स्रोतसाधनको अधिकतम प्रयोग गर्दै कल्याणकारी काम र कार्यस्थलको वातावरण सुधारलाई निरन्तरता दिइने उनले बताए। प्रहरीको कार्यगत स्वतन्त्रता, सेवाको विशिष्टीकरण तथा पारदर्शी, अनुमानयोग्य र क्षमतामा आधारित वृत्तिविकास प्रणालीका लागि आवश्यक नीतिगत व्यवस्थामा गृह मन्त्रालय र सरकारसँग पहल गरिने उनको भनाइ छ।
यसअघि गृहमन्त्री सुधन गुरुङले उनलाई दर्ज्यानी चिह्न प्रदान गरेका थिए। प्रधान कार्यालय पुगेका महानिरीक्षक केसीलाई प्रहरी अतिरिक्त महानिरीक्षक, प्रहरी नायब महानिरीक्षक तथा वरिष्ठ अधिकृत र जवानले स्वागत गरेका थिए। उनले मुख्यालयस्थित अमर प्रहरी स्मारकमा पुष्पहार चढाएर श्रद्धाञ्जली अर्पण गरे।
यसैबीच, उनकै उपस्थितिमा बसेको नीतिनिर्माण समितिको बैठकले मुलुकमा शान्तिसुरक्षा र अमनचयन थप बलियो बनाउन विस्तृत सुरक्षा योजना प्रभावकारी रूपमा कार्यान्वयन गर्ने निर्णय गरेको केन्द्रीय प्रहरी प्रवक्ता अविनारायण काफ्लेले जानकारी दिए।
