जर्मन गाडी निर्माता बीएमडब्लूले चीनमा बिक्रीमा आएको भारी गिरावटपछि कर्मचारी कटौतीको योजनालाई अझ छिटो अघि बढाउने भएको छ। कम्पनीका प्रमुख कार्यकारी मिलान नेदेल्कोभिकले बुधबार पत्रकार सम्मेलनमा आवश्यकताअनुसार कटौती गर्न कम्पनी तयार रहेको बताए।
सेप्टेम्बरमा सकिएको तीन महिनाको अवधिमा बीएमडब्लूको खुद नाफा अघिल्लो वर्षको सोही अवधिको तुलनामा करिब १५ प्रतिशतले घटेर एक अर्ब ४५ करोड युरोमा झरेको छ। सोही अवधिमा कम्पनीको बिक्री पनि करिब छ प्रतिशतले घटेर ३० अर्ब ५० करोड युरोमा सीमित भएको छ। विश्वभर सवारीसाधनको आपूर्ति १० दशमलव तीन प्रतिशतले घटेको छ भने चीनमा मात्रै आपूर्ति २४ दशमलव आठ प्रतिशतले खस्किएको छ।
कम्पनीले गत जुलाईदेखि सुरु गरेको कार्यक्रमअन्तर्गत सन् २०२७ को अन्त्यसम्ममा आठ हजार रोजगारी कटौती गर्ने लक्ष्य राखेको छ। नेदेल्कोभिकका अनुसार योजनाप्रति कर्मचारीको सहभागिता उच्च देखिएकाले निर्धारित समयभन्दा अगावै थप कटौती गर्न सकिने अवस्था बनेको छ।
चीनमा बिक्रीमा आएको तीव्र गिरावटले जर्मनीको अटोमोबाइल उद्योगलाई कठिन पुनर्संरचनातर्फ धकेलेको छ। मर्सिडिज–बेन्जले पनि कर्मचारी कटौती कार्यक्रम पुनः सुरु गर्ने भएको छ भने फोक्सवागनले सन् २०३० सम्ममा आफ्ना १० ब्रान्डअन्तर्गत विश्वभर एक लाख २० हजार रोजगारी कटौती गर्ने योजना बनाएको छ।
बीएमडब्लू, मिनी र रोल्स–रोयस ब्रान्ड समेटिएको कम्पनीले चीनको बजार हिस्सा पुनः प्राप्त गर्ने प्रयासस्वरूप त्यहाँ बिक्री गरिने सवारीसाधनको आपूर्ति शृङ्खलाको ठुलो हिस्सा चीनमै स्थानान्तरण गर्ने प्रतिबद्धता जनाएको छ। नेदेल्कोभिकका अनुसार चीनमा सञ्चालन भइरहेको व्यवसायबाट कम्पनीले अन्य देशमा पनि उपयोग गर्न सकिने अनुभव र प्रविधि सिकिरहेको छ। उनले स्थानीय साझेदार मोमेन्टासँगको सहकार्यमा विकसित गरिएको चालक सहायता सफ्टवेयरलाई यसको उदाहरणका रूपमा प्रस्तुत गरे।
