नेपाल प्रिमियर लिगमा आज बिहीबार कीर्तिपुरको त्रिभुवन विश्वविद्यालय मैदानमा दुई खेल हुँदैछन्। दिउँसोको पहिलो खेलमा अपराजित लुम्बिनी लायन्स र जनकपुर बोल्ट्स आमनेसामने हुनेछन् भने साँझको दोस्रो खेलमा काठमाडौँ गोर्खाजले विराटनगर किंग्सको सामना गर्नेछ।
दिउँसो १२:३० बजेदेखि सुरु हुने पहिलो खेलमा लुम्बिनी आफ्नो अपराजित यात्रा कायम राख्दै चौथो जितको खोजीमा हुनेछ। तीन खेल खेलेको लुम्बिनीले दुईमा जित निकालेको छ भने एउटा खेलमा अङ्क बाँडेको छ। पाँच अङ्कसहित तालिकाको शीर्ष स्थानमा रहेको टोलीका लागि आजको जितले अग्रता थप बलियो बनाउनेछ।
यता जनकपुरले चार खेलमा दुई जित र दुई हारसहित चार अङ्क जोडेको छ र तालिकाको चौथो स्थानमा छ। समान अङ्क भएका कर्णाली र विराटनगर रनरेटका आधारमा अगाडि छन्। पाँचौँ खेल खेल्न लागेको जनकपुर तेस्रो जित निकालेर माथिल्लो स्थानमा उक्लिने दाउमा छ।
साँझ ५ बजेदेखि हुने दोस्रो खेलमा काठमाडौँ गोर्खाज र विराटनगर किंग्स भिड्नेछन्। दुई खेलमा एक जित र एक हार निकालेको काठमाडौँ दुई अङ्कसहित तालिकाको पुछारबाट दोस्रो स्थानमा छ, त्यसैले आजको खेल उसका लागि जित्नैपर्ने दबाबको खेल हो।
चार खेलमा दुई जित निकालेको विराटनगर चार अङ्कसहित तालिकाको दोस्रो स्थानमा छ। सन्दीप लामिछानेको कप्तानीमा रहेको टोली पाँचौँ खेलमा तेस्रो जितको खोजीमा हुनेछ।
