विदेशमा रोजगारी खोज्दै जाने युवाको भीड बढिरहेका बेला रसुवाका एक युवाले आफ्नै गाउँमा पसिना बगाएर राम्रो आम्दानी गर्न सकिने उदाहरण प्रस्तुत गरेका छन्। गोसाइँकुण्ड गाउँपालिका–६ नागुङका ३४ वर्षीय पासाङ शेर्पाले चौँरीपालनलाई व्यावसायिक बनाएर वर्षमा करिब पाँच लाख रुपैयाँ खुद आम्दानी गरिरहेका छन्।
तीन वर्ष मलेसियामा काम गरेर फर्किएका पासाङले त्यहाँ अपेक्षा गरेअनुसारको कमाइ हुन नसकेपछि जन्मथलोमै फर्किने निर्णय गरे। बुबा र हजुरबुबाको पालादेखि चल्दै आएको चौँरीपालनलाई उनले व्यवसायको रूपमा अघि बढाए। सुरुमा परिवारको भागमा परेका १० वटा चौँरीबाट थालेको उनको यात्रा अहिले निकै फराकिलो भएको छ।
पछिल्ला ११ वर्षदेखि निरन्तर चौँरीपालनमा लागेका पासाङसँग अहिले करिब ६० वटा चौँरी छन्, जसको मूल्य करिब ४५ लाख रुपैयाँ बराबर रहेको छ। उनले उत्पादन गर्ने दूध र दुग्धजन्य पदार्थ काठमाडौंस्थित दुग्ध विकास संस्थानमा बिक्री हुने गरेको छ। चौँरीले वर्षमा छ महिना मात्र दूध दिने भएकाले त्यही अवधिमा करिब ११ लाख रुपैयाँ बराबरको कारोबार हुने उनले बताए। बाँकी छ महिना चौँरी चरन क्षेत्रमा घाँस खाएर बस्छन्। सबै खर्च कटाएपछि वर्षमा करिब पाँच लाख रुपैयाँ बचत हुने गरेको पासाङको भनाइ छ।
तीन वर्षअघि गोसाइँकुण्ड गाउँपालिकाबाट पाएको सात लाख रुपैयाँ अनुदानले व्यवसायलाई व्यवस्थित र विस्तार गर्न ठूलो सहयोग पुगेको उनले बताए। व्यवसायलाई अझै व्यवस्थित बनाउन उनले नागुङमा १३ रोपनी जग्गामा चौँरीका लागि गोठ पनि निर्माण गरेका छन्।
पासाङको मेहनतबाट गाउँपालिकाका अध्यक्ष कैसाङनुर्पु तामाङ खुसी छन्। उनले पासाङलाई गाउँपालिकाकै उदाहरणीय र नमूना किसानका रूपमा चित्रण गरे। वडा नं. ६ का वडाध्यक्ष कर्मा दावा सिदार वाइबाले पनि पासाङको सफलताले गाउँका अन्य युवालाई आफ्नै ठाउँमा उद्यम गर्न प्रेरणा दिएको बताए।
