रसुवाको स्याफ्रुबेंसीका स्थानीय बासिन्दा छेतेन ग्याल्पोले हिमालप्रतिको आफ्नो अनुभूति नै बदलिएको बताएका छन्। पहिले हिमाल देख्दा मनमा गर्व र खुसी भरिने गरे पनि अहिले त्यही हिमालले त्रास पैदा गर्न थालेको उनको भनाइ छ।
ग्याल्पो रसुवा चेम्बर अफ कमर्समा आबद्ध छन् र नाका क्षेत्रमा व्यापार व्यवसाय गर्दै आएका छन्। बाल्यकाल काठमाडौँमा बिताएका उनले स्नातक अध्ययन पूरा गरेपछि आफ्नै गाउँठाउँमा केही गर्नुपर्छ भन्ने सोचेर स्याफ्रुबेंसी फर्किएका थिए। आफ्नो ठाउँ आर्थिक र व्यापारिक दृष्टिले सुगम रहेको र बाहिर भौतारिनु नपर्ने उनको अनुभव छ।
यसपटकको पहिरोले उनका परिवारका छ जना सदस्यको ज्यान गएको छ भने पाँचवटा घर सखाप भएका छन्। आफ्नो आर्थिक आधार नै त्यही ठाउँमा रहेको र बाहिर अन्यत्र लगानी नगरेको उनले बताए।
सोमबार राजधानीको दरबारमार्गमा इन्स्टिच्युट अफ स्ट्राटेजिक स्टडिज एण्ड सोसियो इकोनोमिक रिसर्च र खबरहबले आयोजना गरेको ‘जलवायु पीडितदेखि जलवायु नेतृत्वसम्म’ विषयक अन्तरक्रियामा बोल्दै ग्याल्पोले प्रकृतिसँग जोडिएका विषयलाई गम्भीरतापूर्वक लिनुपर्ने बताए। पछिल्लो १० देखि १५ वर्षमा हिमालको माथिल्लो क्षेत्रमा आएको विनाशकारी परिवर्तनको असर माथिदेखि तलसम्म सबैले भोग्नुपरेको उनको भनाइ छ।
उनले जलविद्युत् आयोजनाको स्थान छनोटमा पनि पुनर्विचार गर्नुपर्ने बताए। बाढीले ड्यामहरूलाई तहसनहस पारेको उल्लेख गर्दै उनले बस्ती ड्यामभन्दा पछि बनेको होइन, पुर्खौंदेखि नै गाउँहरू त्यहाँ बसोबास गर्दै आएको बताए।
सन् २०१५ मा लाङटाङमा आएको हिमपहिरो ठूलो चेतावनी भएको र छ-सात महिनाअघि पनि यस्तै समस्या भोगिएको उनले सम्झिए। त्यसबेला अब यस्तो ठूलो विपद् नआउने ठानेर कुनै पूर्वतयारी नगरेको उनको भनाइ छ। कार्यक्रमबाट केही सहयोग र निकास मिलोस् भन्ने आशा व्यक्त गर्दै उनले आफ्नो भनाइ अन्त्य गरे।
