अर्घाखाँची, १९ कात्तिक — डिभिजन वन कार्यालय अर्घाखाँचीले कृत्रिम बुद्धिमत्ता (एआई) प्रयोग गरेर वन्यजन्तुका भ्रामक तस्बिर तथा भिडियो तयार नगर्न सर्वसाधारणलाई आग्रह गरेको छ।
पछिल्ला दिनमा एआई प्रविधिबाट बनाइएका तस्बिर र भिडियो सामाजिक सञ्जालमा व्यापक रूपमा देखिन थालेका छन्। कार्यालयका अनुसार विशेषगरी पाटेबाघ र चितुवाजस्ता संरक्षित तथा संवेदनशील वन्यजन्तुका वास्तविकताभन्दा फरक सामग्री प्रसारण भइरहेका छन्।
सूचना अधिकारी केशर खड्काले यस्ता कृत्रिम सामग्रीले वन्यजन्तुको वास्तविक अवस्था र आचरणबारे सर्वसाधारणमा गलत बुझाइ जन्माउन सक्ने बताए। उनका अनुसार यसले मानव र वन्यजन्तुबीचको सहअस्तित्वबारे नकारात्मक धारणा फैलाउनुका साथै मानिसमा अनावश्यक डर पनि सिर्जना गर्न सक्छ।
त्यसैले वन्यजन्तुसम्बन्धी गलत सूचना र नकारात्मक सन्देश फैलिन नदिन यस्ता सामग्री उत्पादन, प्रकाशन वा प्रसारण नगर्न कार्यालयले सबैमा अनुरोध गरेको छ।
सामाजिक सञ्जालमा कुनै पनि सामग्री राख्नुअघि त्यसको सत्यता र त्यसले पार्न सक्ने असरबारे सोच्न कार्यालयले आग्रह गरेको छ। वन्यजन्तु तथा जैविक विविधता संरक्षणमा जिम्मेवार नागरिकको भूमिका निर्वाह गर्न कार्यालयले सम्पूर्ण जिल्लावासीलाई अपिल गरेको छ।
