नजिकिँदै गरेको तिहारका बेला देशभर अधिकांश समय घाम लाग्ने पूर्वानुमान गरिएको छ। आगामी एक सातासम्म धेरैजसो ठाउँमा पानी पर्ने सम्भावना नरहेको मौसमविद्हरूले बताएका छन्।
मौसम विज्ञान विभागले कात्तिक १९ गतेदेखि २३ गते गाईपूजाको दिनसम्मको पूर्वानुमान सार्वजनिक गर्दै मौसममा ठूलो फेरबदल नहुने जानकारी दिएको छ। बुलेटिनअनुसार एक–दुई ठाउँमा मात्र हल्का पानी पर्न सक्छ भने तराई–मधेश, उपत्यका र खोँचहरूमा बिहानपख हल्का हुस्सुकुहिरो लाग्नेछ।
यस वर्ष यमपञ्चकको पहिलो दिन काग तिहार कात्तिक २२ गते परेको छ भने भाइटीका २५ गते छ। त्रिभुवन विश्वविद्यालयको जल तथा मौसम विज्ञान केन्द्रीय विभागका सहप्राध्यापक डा. विनोद पोखरेलले तिहार अवधिभर व्यापक वा लगातार वर्षाको सम्भावना नरहेको बताएका छन्।
मौसम अनुकूल रहने देखिएकाले चाड धुमधामसँग मनाउने तयारीमा रहेका सर्वसाधारण र धान काट्ने तयारीमा रहेका किसानका लागि आगामी दिन सहज हुने उनको भनाइ छ। तर घमाइलो मौसमसँगै वायु प्रदूषण बढ्ने जोखिमतर्फ पनि उनले ध्यानाकर्षण गराएका छन्। जाडोयाममा कम पानी पर्ने, हावा बेस्सरी नचल्ने तथा उद्योग, सवारी साधन, कृषि कर्म र पूर्वाधार निर्माणको गतिविधिले प्रदूषण बढाउने गर्दछ।
