बलिउड अभिनेता सलमान खान करिब ११ वर्षपछि फेरि गायनमा फर्किएका छन्। उनले आफ्नो आगामी फिल्म ‘मातृभूमि’का लागि गीत गाएका हुन्। बुधबार बिहान कुनै पूर्वसूचना बिना सार्वजनिक भएको ‘तेरी सेक्सी ब्युटी’ नामको गीतले अहिले सामाजिक सञ्जालमा निकै चर्चा पाइरहेको छ।
गीतमा सलमानसँगै गायिका मुस्कानको स्वर सुन्न सकिन्छ। साजिद खानको शब्द तथा संगीत रहेको यो गीतको भिडियोमा सलमान अभिनेत्री चित्रांगदा सिंहसँग रोमान्टिक अन्दाजमा देखिएका छन्।
सलमानका लागि यो गीत विशेष मानिएको छ, किनभने उनले लामो समयदेखि कुनै फिल्मका लागि पार्श्वगायन गरेका थिएनन्। सन् २०१५ मा प्रदर्शन भएको फिल्म ‘हिरो’को ‘मै हुँ हिरो तेरा’ उनको पछिल्लो चर्चित फिल्मी गीत थियो। त्यसअघि ‘ह्याङओभर’, ‘बेबीको बास पसन्द है’ र ‘जग घुमेया’ जस्ता गीतमार्फत उनले दर्शकको मन जितेका थिए।
फिल्मी गीतबाट टाढा रहे पनि सलमानले गायन भने छाडेका थिएनन्। सन् २०२० मा उनले ‘प्यार करोना’, ‘तेरे बिना’ र ‘भाइ भाइ’ जस्ता स्वतन्त्र गीत सार्वजनिक गरेका थिए।
नयाँ गीत सार्वजनिक भएसँगै दर्शकबीच एउटा प्रश्न पनि उठेको छ— युद्धको कथामा आधारित भनिएको ‘मातृभूमि’मा किन यस्तो रोमान्टिक र रमाइलो गीत राखियो? गीतको शैली र फिल्मको कथावस्तुबीचको भिन्नताले दर्शकलाई आश्चर्यमा पारेको छ। अपूर्व लाखियाको निर्देशनमा बनेको फिल्ममा सलमान भारतीय सैनिकको भूमिकामा छन् भने चित्रांगदा उनकी पत्नीको चरित्रमा देखिनेछिन्। फिल्मको प्रदर्शन मिति भने अझै सार्वजनिक गरिएको छैन।
