नेपाल निर्माण व्यवसायी महासङ्घका अध्यक्ष निकोलस पाण्डेले मुलुकलाई १०० अर्ब डलरको अर्थतन्त्र बनाउन सडक तथा पूर्वाधारको दूरी घटाउने स्पष्ट लक्ष्यसहित काम गर्नुपर्ने बताएका छन्। पूर्वाधार सम्मेलनको जानकारीका लागि बिहीबार आयोजना गरिएको पत्रकार सम्मेलनमा बोल्दै उनले पूर्वाधार विकास मन्त्री सुनिल लम्सालको ३, ६, ९, १२ बराबर १०० को सूत्र सापटी लिँदै पूर्वाधारमा समय र दूरी छोट्याउनुपर्ने तर्क गरे।
अध्यक्ष पाण्डेका अनुसार नेपालले लिएको १०० बिलियन डलरको अर्थतन्त्र बन्ने महत्त्वाकाङ्क्षी लक्ष्य पूर्वाधारमा समय र दूरी छोट्याएर मात्र सम्भव छ। उनले सूत्रको व्याख्या गर्दै भने, काठमाडौँबाट तीन घण्टामा चितवन र तीन देखि साढे तीन घण्टामा पोखरा पुग्न सकियोस्। त्यसैगरी छ घण्टामा काँकडभिट्टा, नौ घण्टामा कञ्चनपुर र पूर्व मेचीदेखि पश्चिम महाकालीसम्म १२ घण्टामा यात्रा तय गर्न सकिने पूर्वाधार तयार भएपछि मात्रै १०० बिलियन डलरको अर्थतन्त्र हासिल हुन सक्छ।
पूर्वाधार विकासको परम्परागत मापन पद्धतिप्रति टिप्पणी गर्दै उनले वार्षिक रूपमा कति किलोमिटर सडक कालोपत्रे भयो भन्ने आधारमा मात्र विकासको मूल्याङ्कन गर्न नहुने धारणा राखे। पूर्वाधार विकासको मापन यो वर्ष कति किलोमिटर सडक पिच भयो भन्नेमा मात्र सीमित हुनुहुँदैन, नेपालका प्रत्येक भूभागबिचको यात्रा समय कति घण्टा घटाउन सकियो भन्ने आधारमा पूर्वाधार विकास नापिनुपर्छ भन्ने उनको भनाइ छ। अनि मात्र वास्तविक आर्थिक समृद्धि हासिल हुन्छ भन्ने निर्माण व्यवसायी महासङ्घको ठहर रहेको पाण्डेले बताए।
