भारतीय विदेश सचिव विक्रम मिश्रीको दुईदिने औपचारिक नेपाल भ्रमणपछि दुवै देशले द्विपक्षीय साझेदारीलाई थप उचाइमा पुर्याउने प्रतिबद्धता जनाएका छन्। भ्रमणको समापनपछि जारी संयुक्त वक्तव्यमा नेपाल–भारत सम्बन्ध र आपसी सहकार्यका विभिन्न विषयमा छलफल भएको उल्लेख छ।
नेपालका परराष्ट्र सचिव अमृतबहादुर राईको मैत्रीपूर्ण निमन्त्रणामा काठमाडौं आएका मिश्रीले प्रधानमन्त्री बालेन्द्र शाहसँग शिष्टाचार भेट गरेका थिए। भेटमा उनले भारतीय प्रधानमन्त्री नरेन्द्र मोदीका तर्फबाट शुभकामना व्यक्त गर्दै नेपाली प्रधानमन्त्रीको आसन्न भारत भ्रमणका क्रममा अघि बढाउन सकिने पहल र सम्भावित उपलब्धिबारे छलफल गरेका थिए।
भ्रमणका क्रममा मिश्रीले अर्थमन्त्री स्वर्णिम वाग्ले, परराष्ट्रमन्त्री शिशिर खनाल, ऊर्जा, जलस्रोत तथा सिँचाइमन्त्री विराजभक्त श्रेष्ठ र भौतिक पूर्वाधार विकासमन्त्री सुनील लम्सालसँग छुट्टाछुट्टै भेटवार्ता गरे। नेपालका परराष्ट्र सचिव राईसँग प्रतिनिधिमण्डलस्तरीय वार्ता पनि भयो।
वार्तामा व्यापार तथा वाणिज्य, विकास साझेदारी, जलविद्युत्, भौतिक सम्पर्क सञ्जाल, सीमा व्यवस्थापन, ऊर्जा र जनस्तरको सम्बन्ध विस्तार गर्ने विषयमा जोड दिइएको छ। स्टार्टअप, डिजिटल कनेक्टिभिटी, कृत्रिम बुद्धिमत्ता र खेलकुदजस्ता नयाँ क्षेत्रमा सहकार्यका सम्भावनाबारे पनि छलफल भएको वक्तव्यमा उल्लेख छ। नेपाली नेतृत्वले रसुवा–भोटेकोशी क्षेत्रमा आएको बाढीपछि भारतले उपलब्ध गराएको मानवीय तथा प्राविधिक सहयोगप्रति आभार व्यक्त गरेको छ।
