काठमाडौं । हिमाली क्षेत्रमा जलवायु परिवर्तनले पारेको असर, जलवायु न्याय र भोटेकोशी–त्रिशूली विपद्का विषयमा गठित संसद्को विशेष समितिको बैठक आज बस्दै छ। संसद् सचिवालयका अनुसार बैठक बिहान साढे ९ बजे पूर्वाधार विकास समितिको हलमा हुनेछ।
बैठकमा अर्थ मन्त्रालय र पूर्वाधार विकास मन्त्रालयका अधिकारीहरूलाई बोलाइएको छ। समितिले विपद्पछि भएका उद्धार, राहत, पुनर्निर्माण र पुनर्स्थापनाका कामको पछिल्लो प्रगति विवरण माग्ने कार्यसूची तय गरेको छ।
भोटेकोशी र त्रिशूली क्षेत्रमा आएको विपद्ले ठूलो क्षति पुर्याएको थियो। त्यसपछि प्रभावितको राहत र पुनर्निर्माणको काम कुन चरणमा पुगेको छ भन्ने विषयमा समितिले मन्त्रालयसँग विस्तृत जानकारी लिन लागेको हो।
जलवायु परिवर्तनका कारण हिमाली क्षेत्रमा बढ्दै गएको जोखिम र त्यसबाट प्रभावित समुदायलाई न्याय दिलाउने विषय पनि समितिको कार्यक्षेत्रमा छ। बैठकले मन्त्रालयहरूबाट प्राप्त विवरणका आधारमा आगामी कदमबारे छलफल गर्ने अपेक्षा गरिएको छ।
