बागलुङ। बागलुङ नगरपालिका–२, हल्लनचोकमा ७० वर्षीया वृद्ध महिलाको घाँटीमा लगाएको सुनको सिक्री खोसेर भाग्ने दुई युवकलाई प्रहरीले पक्राउ गरेको छ। पक्राउ परेका दुवै पर्सा जिल्लाका हुन् — वीरगञ्ज महानगरपालिका–२० का १९ वर्षीय रबिन कुमार यादव र १८ वर्षीय प्रकाश राय यादव।
प्रहरीका अनुसार गत कात्तिक २ गते दिउँसो १ः०९ बजेतिर हल्लनचोकमा ७० वर्षीया कृष्ण माया पुनले लगाएको २.७८ तोलाको सुनको सिक्री ती दुवैले तानेर भागेका थिए। उक्त सिक्रीको मूल्य आठ लाख छ हजार दुई सय रुपैयाँ रहेको प्रहरीले जनाएको छ।
घटनाको जानकारी पाएपछि पुगेको प्रहरी टोलीले हल्लनचोक क्षेत्रमै खोजी गर्दै उनीहरूलाई फेला पारी खानतलासी गरेको थियो। खानतलासीका क्रममा सुनको सिक्री बरामद भएपछि दुवैलाई नियन्त्रणमा लिइएको हो।
पक्राउ परेकाविरुद्ध बागलुङ जिल्ला अदालतबाट पाँच दिनको म्याद थप गरी थप अनुसन्धान भइरहेको जिल्ला प्रहरी कार्यालय बागलुङका सूचना अधिकारी प्रहरी नायब उपरीक्षक रामेश्वर त्वातीले जानकारी दिएका छन्।
