गोरखा जिल्लाको उत्तरी भेगमा रहेको साम्दो लार्के बजार नजिक खसेको सुक्खा पहिरोले रेमुनाङ खोला थुनिएको छ। पहिरोको थुप्रोले खोलाको बहाव रोकिँदा करिब डेढ सय मिटर लामो ताल बनेको छ। स्थानीय बासिन्दाले शुक्रबार बिहानै उक्त अवस्था देखेपछि सम्बन्धित निकायलाई जानकारी गराएका हुन्।
रेमुनाङ खोला बुढीगण्डकी नदीको मुहान नजिक पर्ने भएकाले ताल एक्कासि फुटेमा तल्लो तटीय क्षेत्रमा ठूलो बाढी आउन सक्ने चिन्ता छ। त्यसैले बुढीगण्डकी किनारका बस्तीका बासिन्दालाई सतर्क रहन आग्रह गरिएको छ। यद्यपि ताल तत्कालै फुटिहाल्ने अवस्थामा नरहेको स्थानीयको भनाइ छ।
घटनास्थलमा रहेका स्थानीय निमा दोर्जेका अनुसार आवश्यक उपकरण उपलब्ध भएमा थुनिएको पानीलाई बिस्तारै खोल्न सकिन्छ। ‘अहिले नै फुटिहाल्ने अवस्था छैन। उपकरण भयो भने खोल्न पनि सकिन्छ,’ उनले भने, ‘अहिले असर नपरे पनि फुटिहाल्यो भने ठूलै बाढी आउँछ।’
हिमाली क्षेत्रमा यसरी खोला थुनिएर ताल बन्ने घटना जोखिमपूर्ण मानिन्छ। पानीको चाप बढ्दै गएमा बाँधजस्तै बनेको पहिरोको थुप्रो भत्किन सक्छ। त्यसैले तालको अवस्थाबारे निरन्तर निगरानी गर्न र तटीय बस्तीलाई समयमै पूर्वसूचना दिन सम्बन्धित निकायको ध्यान जानु जरुरी छ।
