झापामा प्रहरीले चिया बगानभित्र लुकाइराखिएको ठूलो परिमाणको गाँजा फेला पारेको छ। मेचीनगर नगरपालिका–५ सिर्जना चोक क्षेत्रमा रहेको बगानबाट शुक्रबार बिहान ५५७ केजी गाँजा बरामद भएको जिल्ला प्रहरीले जनाएको छ।
स्थानीय टेकेन्द्र थापाको व्यक्तिगत चिया बगानमा १३ वटा पोकामा राखिएको गाँजा फेला परेको हो। प्लास्टिकसहित तौल गर्दा गाँजाको परिमाण ५६२ केजी ८०० ग्राम पुगेको थियो भने प्लास्टिक हटाएपछि ५५७ केजी रहेको प्रहरीको भनाइ छ।
बगानभित्र लुकाइएको अवैध पदार्थ फेला परेपछि प्रहरीले त्यसलाई नियन्त्रणमा लिएको छ। बरामद गाँजाको मुचुल्का तयार गरिएको छ र गाँजा कसले, कहिलेदेखि र कुन प्रयोजनका लागि त्यहाँ राखेको थियो भन्नेबारे अनुसन्धान अगाडि बढाइएको प्रहरीले जनाएको छ।
झापा जिल्लामा पछिल्लो समय लागूऔषधसँग जोडिएका घटना बढ्दै गएको प्रहरीको भनाइ छ। यसअघि पनि जिल्लाका विभिन्न स्थानबाट ठूलो परिमाणमा गाँजा र अन्य लागूऔषध बरामद हुँदै आएका छन्। प्रहरीले सीमावर्ती क्षेत्रमा निगरानी कडा पारिएको र यस्ता गतिविधिविरुद्ध कारबाही जारी रहने बताएको छ।
