अल अमिरात क्रिकेट मैदानमा शुक्रबार भएको यु–१९ एसिया कपको खेलमा नेपालको ब्याटिङ भारतको बलिङसामु टिक्न सकेन। टस जितेर पहिले बलिङ गर्ने निर्णय गरेको भारतले नेपाललाई ४२.३ ओभरमा १२८ रनमै समेट्यो।
नेपालका लागि दर्श सुनारले सर्वाधिक ४३ रन बनाए। उनले ९३ बल खेलेर एक चौका र एक छक्का प्रहार गरे। आशीष लोहारले २९ रन र नीरज यादवले २० रनको योगदान दिए। तर अरू ब्याटरले खासै साथ दिन सकेनन्। आठ खेलाडी दोहोरो अङ्कमा पुग्न सकेनन् भने चार जना शून्य रनमै पभिलियन फर्किए।
भारतका बलरहरूले सुरुदेखि नै दबाब बनाएका थिए। ईशान सूद र अर्जुन राजपुतले तीन–तीन विकेट लिए। यशवीर गौडले दुई विकेट हात पारे भने काव्य पटेल र मनल चौहानले एक–एक विकेट लिए।
अब भारतलाई जितका लागि १२९ रन चाहिएको छ। प्रतियोगितामा आफ्नो पहिलो खेल खेलिरहेको भारत बलियो स्थितिमा छ भने नेपालले बलिङबाट खेलमा फर्किनुपर्ने चुनौती छ।
