काठमाडौं — नेपाल स्टक एक्सचेन्ज (नेप्से) परिसूचक सामान्य सुधारसहित बन्द भएको छ। दिनभरको उतारचढावपछि परिसूचक २.६४ अङ्कले बढेर २६५५.२२ बिन्दुमा पुगेको छ।
कारोबार अवधिको मध्याह्नतिर परिसूचक २६६२ बिन्दुसम्म पुगेको थियो। त्यसपछि केही ओरालो लागे पनि अन्तिम समयमा बजार सम्हालिँदै हरियो भएर बन्द भएको हो।
आज बजारमा कुल ३३६ वटा स्क्रिप्सको किनबेच भयो। दिनभर ३३ हजार २१५ वटा कारोबारमार्फत् एक करोड सात लाख कित्ता सेयर खरिदबिक्री हुँदा कुल तीन अर्ब ४६ करोड २० लाख रुपैयाँ बराबरको कारोबार भएको छ।
बढेका कम्पनीको संख्या धेरै रह्यो। कुल १५८ वटा कम्पनीको सेयर मूल्य बढ्दा १०७ वटाको घट्यो भने १४ वटाको मूल्य स्थिर रह्यो। कारोबार भएका अधिकांश उपसमूहमा सुधार देखिएको छ भने अन्य समूहमा सामान्य गिरावट आयो।
आज सर्वाधिक कमाउने सूचीमा क्रेष्ट माइक्रो लाइफ इन्स्योरेन्स रह्यो। यसको सेयर मूल्य १४.०८ प्रतिशतले बढेर प्रतिकित्ता ११९२ रुपैयाँ पुगेको छ। कारोबार रकमका आधारमा भने घोराही सिमेन्ट अग्रस्थानमा रह्यो, जसको २१ करोड ६३ लाख रुपैयाँभन्दा बढीको सेयर किनबेच भयो।
